مرکزی بجٹ: اپوزیشن نے کھوکھلا ، حکمراں پارٹی نے اسے بہترین قرار دیا

عظمیٰ ویب ڈیسک
نئی دہلی/اپوزیشن نے مرکزی بجٹ 2025-26 کو زراعت، تعلیم، روزگار اور صحت کے حوالے سے کھوکھلا بجٹ قرار دیتے ہوئے کہا کہ یہ وفاقی جذبے کے خلاف ہے اور ریاستوں کے تحفظات کو خاطر میں نہیں رکھا گیا ہے جبکہ حکمراں پارٹی نے مرکزی بجٹ کو اب تک کا بہترین قرار دیتے ہوئے کہا کہ غریب، خواتین، نوجوان اور کسانوں کو مرکز میں رکھ کر حکومت نے ملک میں غذائیت سے لیکر انفرادی طورپر اقتصادی بااختیار بنانے کے لئے موثر قدم اٹھائے ہیں۔
لوک سبھا میں وقفہ سوالات ختم ہونے کے بعد پریزائیڈنگ افسر دلیپ سائکیا نے عام بجٹ پر بحث شروع کرنے کے لیے کانگریس کے ڈاکٹر دھرم ویر گاندھی کا نام لیا۔ اس پر کانگریس کے کے وینوگوپال نے اعتراض کیا کہ وزیر خزانہ نرملا سیتا رمن ایوان میں نہیں ہیں۔ اس لیے بحث شروع نہیں ہو سکتی۔ اس پر پارلیمانی امور کے وزیر کرن رجیجو نے کہا کہ وزیر مملکت برائے خزانہ پنکج چودھری موجود ہیں اور ایسا کوئی اصول نہیں ہے کہ اگر وزیر خزانہ موجود نہ ہوں تو بحث نہیں ہو سکتی۔ اس معاملے پر تنازعہ کے درمیان اسپیکر اوم برلا بھی ایوان میں پہنچ گئے۔ اسی دوران وزیر خزانہ ایوان میں پہنچیں اور بحث شروع ہو گئی۔
ڈاکٹر گاندھی نے کہا کہ ہندوستان کوئی ایسی قوم نہیں ہے جس میں ریاستیں تقسیم ہوں بلکہ یہ ایک ایسی قوم ہے جس میں ریاستوں نے اپنے حقوق سے دستبردار ہو کر ایک دوسرے کو ایک قوم کے طور پر قبول کر لیا تھا۔ یہ بجٹ بھی یکطرفہ اور وفاقی نظام کے خلاف ہے کیونکہ اس میں ریاستوں کے تحفظات کو کوئی جگہ نہیں دی گئی اور اسے کمروں میں بیٹھ کر تیار کیا گیا ہے۔ انہوں نے کہا کہ ریاستوں میں مجموعی گھریلو پیداوار (جی ڈی پی) بڑھتی ہے لیکن بجٹ میں ریاستوں کو مدنظر نہیں رکھا جاتا ہے۔
بجٹ کی دفعات کا ذکر کرتے ہوئے انہوں نے کہا کہ یہ بجٹ زراعت کے نقطہ نظر سے کسانوں کو کچھ نہیں دے رہا ہے۔ کم از کم امدادی قیمت کی قانونی ضمانت کی کوئی بات نہیں ہے۔ حکومت زرعی آلات پر گڈز اینڈ سروسز ٹیکس (جی ایس ٹی) میں کوئی راحت نہیں دینا چاہتی ہے۔ ہر سال ہزاروں کسان مر جاتے ہیں۔ ان کے خدشات دور کرنے کے لیے کچھ نہیں کیا گیا۔ زراعت پر مبنی صنعتوں کے لیے کچھ نہیں کہا گیا۔ اسی وجہ سے بے روزگار نوجوان کھیتی باڑی چھوڑ کر بیرون ملک چلے جاتے ہیں اور وہاں سے بھی انہیں ہتھکڑیوں اور بیڑیوں میں جکڑکر بھگایا جاتا ہے۔ یہ حکومت کی سراسر غفلت ہے۔
انہوں نے کہا کہ صنعتوں اور مینوفیکچرنگ یونٹس بالخصوص فارما انڈسٹری کے لیے کوئی منصوبہ نہیں ہے۔ اس شعبہ کو دس سال سے نظر انداز کیا جارہا ہے۔ کچھ میگا کارپوریٹس کی خاطر ایم ایس ایم ای کو نظر انداز کیا جا رہا ہے۔ انہوں نے کہا کہ تعلیمی نظام کو بہت زیادہ نظر انداز کیا جا رہا ہے۔ پرائیویٹ سیکٹر کے اداروں کی فیس بہت مہنگی ہے۔ عام لوگوں کی اپنے بچوں کو پرائیویٹ اداروں میں پڑھانے کی حیثیت نہیں ہے۔ یہ نجی تعلیمی ادارے نہ صرف طلباء اور والدین بلکہ اساتذہ کا بھی استحصال کر رہے ہیں۔ اساتذہ کو کم تنخواہوں پر کنٹریکٹ پر رکھا جا رہا ہے اور ان کی حیثیت یومیہ اجرت والے مزدوروں جیسی ہو گئی ہے۔
ڈاکٹر گاندھی نے غربت، غذائی قلت اور پانی سے پھیلنے والی متعدی بیماریوں کا معاملہ اٹھایا اور کہا کہ اس طرح کی بیماریوں سے ہر سال لاکھوں لوگ مر رہے ہیں لیکن بجٹ میں اس کے لیے کچھ نہیں رکھا گیا۔ بجٹ میں ملک میں 200 کینسر ڈے کیئر سینٹرز قائم کرنے کا ذکر ہے لیکن کینسر کی روک تھام کے لیے اسکریننگ کے انتظامات کا کوئی منصوبہ نہیں ہے۔ انہوں نے کہا کہ مذہب، ذات پات اور جنس کی بنیاد پر امتیازی سلوک کی وجہ سے لوگ مالی بحران کا شکار ہیں۔
بھارتیہ جنتا پارٹی (بی جے پی) کے راؤ راجندر سنگھ نے اپنی تقریر کا آغاز 2017 کے نوبل انعام یافتہ رچرڈ ایچ تھیلر کا حوالہ دیتے ہوئے کیا اور کہا کہ معیشت اور نفسیات کے درمیان تعلق ہوتا ہے۔ نفسیاتی طور پر لوگوں کا مطمئن ہونا ضروری ہے کہ حکومت ان کے لیے کچھ کر رہی ہے۔ اس نقطہ نظر سے انہوں نے عام بجٹ کو آج تک کا بہترین بجٹ قرار دیا۔ انہوں نے کہا کہ اس بجٹ میں غریبوں، نوجوانوں، خواتین اور کسانوں پر توجہ دی گئی ہے۔ انہوں نے اپوزیشن کو نشانہ بناتے ہوئے کہا کہ ہندوستان میں آئین کے نفاذ کے وقت آبادی 33 کروڑ تھی جب کہ چند روز بعد کیے گئے فوڈ سروے میں فی شخص غذائیت سے بھرپور خوراک کی دستیابی 394 گرام تھی۔ 60 سال بعد آبادی 100 کروڑ تک پہنچ گئی اور اس میں کوئی تبدیلی نہیں آئی۔ 2014 میں غذائیت سے بھرپور خوراک کی دستیابی کا اعداد و شمار صرف 468.7 گرام تک پہنچ سکا۔ پچھلے دس برسوں میں یہ تعداد 510 گرام تک پہنچ گئی۔ اگر اس تعداد میں ہر سال صرف پانچ گرام کا اضافہ ہوتا تو آج یہ 1000 گرام سے زیادہ ہوتی۔
انہوں نے کہا کہ متوسط آمدنی والے طبقے کو اتنے فوائد آج تک کسی حکومت نے نہیں دیے جتنے نریندر مودی حکومت نے دیے ہیں۔ انہوں نے کہا کہ یہ غلط فہمی ہے کہ حکومت کارپوریٹس کو زیادہ فوائد دے رہی ہے متوسط طبقے کو نہیں۔ جبکہ اعداد و شمار بتاتے ہیں کہ انفرادی انکم ٹیکس دہندگان کو کارپوریٹس کو ملنے والے فوائد سے دگنے سے زیادہ حاصل ہوئے ہیں۔ پانچ برسوں میں انفرادی انکم ٹیکس دینے والوں کو 8 لاکھ کروڑ روپے کا فائدہ ہوا ہے۔ سال 2023-24 میں کارپوریٹ سیکٹر کو 98,899 کروڑ روپے کا فائدہ ہوا ہے جبکہ انفرادی انکم ٹیکس دہندہ کو 2,20,988 کروڑ روپے کا فائدہ ملا ہے۔ اب 12 لاکھ روپے تک کی آمدنی کو ٹیکس فری کرنا سونے پر سہاگا ہے۔
مسٹر سنگھ نے بجٹ کے انتظامات کو روزگار پیدا کرنے والے قرار دیتے ہوئے کہا کہ ہوا بازی کے شعبے میں نئے طیاروں کی خریداری اور سیاحت اور ہوٹل انڈسٹری کی توسیع روزگار میں نمایاں اضافہ کا باعث بنے گی۔ ہندستان میں نجی شعبے کے لیے جوہری توانائی کی اجازت دینے سے روزگار میں بھی اضافہ ہوگا۔