سرینگر// گورنمنٹ میڈیکل کالج اننت ناگ نے گٹلی گنڈ گاؤں میں یرقان کے 27 کیسز رپورٹ ہونے کے بعد ایک پانچ رکنی تحقیقاتی کمیٹی تشکیل دی ہے۔
اِس سلسلے میں جاری ایک حکم نامے کے مطابق، کمیٹی کو ہدایت دی گئی ہے کہ وہ یرقان کے ممکنہ ذرائع، اس کے پھیلاؤ کی وجوہات اور روک تھام کے اقدامات کا تفصیلی جائزہ لے۔
کمیٹی سے کہا گیا ہے کہ وہ متاثرہ گاؤں کا دورہ کرکے صورتحال کا تجزیہ کرے اور اس ماہ کے آخر تک پرنسپل جی ایم سی اننت ناگ کو اپنی سفارشات پر مشتمل ایکشن پلان پیش کرے۔
مزید، کمیٹی کو متاثرہ افراد کے لیے ضروری طبی خدمات کی فراہمی کو یقینی بنانے کی ہدایت بھی کی گئی ہے۔
کمیٹی کی سربراہی ڈاکٹر محبوبہ رسول، ایسوسی ایٹ پروفیسر کمیونٹی میڈیسن جی ایم سی سرینگر کریں گی، جبکہ دیگر اراکین میں ڈاکٹر ابیرو جان (ایسوسی ایٹ پروفیسر مائیکرو بایولوجی)، ڈاکٹر عرفان گل (ایسوسی ایٹ پروفیسر جنرل میڈیسن)، ڈاکٹر آصف عزیز (کنسلٹنٹ پیڈیاٹرکس) اور اعجاز احمد (ہیلتھ ایجوکیٹر یو ایچ ٹی سی برکپورہ) شامل ہیں۔
