کشمیر میں ہلکی برفباری کی پیشگوئی کے درمیان سردی کی شدت برقرار

سرینگر// کشمیر میں ہلکی برفباری کی پیشگوئی کے دوران سخت سردی کا سلسلہ جاری ہے۔
وادی کے تقریباً تمام موسمیاتی مراکز میں جمعہ اور ہفتہ کی درمیانی شب درجہ حرارت نقطہ انجماد سے نیچے ریکارڈ کیا گیا۔
محکمہ موسمیات کے مطابق، جموں کے میدانی علاقوں میں ہفتے کے روز ہلکی بارش جبکہ جموں و کشمیر کے بالائی مقامات پر الگ تھلگ مقامات پر برفباری متوقع ہے۔
انہوں نے مزید کہا کہ 12 سے 14 جنوری تک موسم عمومی طور پر خشک رہے گا، جبکہ 15 اور 16 جنوری کو جزوی ابر آلود موسم کے ساتھ بلند پہاڑی علاقوں میں ہلکی برفباری کا امکان ہے۔
کشمیر صوبہ میں سرینگر کا کم از کم درجہ حرارت منفی 3.6 ڈگری سیلسیس ریکارڈ کیا گیا، جو معمول سے 1.7 ڈگری کم ہے۔ زوجیلا پاس، جو لداخ کو کشمیر سے جوڑتا ہے، میں درجہ حرارت منفی 32.0 ڈگری سیلسیس تک گر گیا، جو خطے کے سب سے سرد علاقوں میں شامل ہے۔
شمالی کشمیر کے مشہور سیاحتی مقام گلمرگ میں شبانہ درجہ حرارت منفی 6.5 ڈگری سیلسیس ریکارڈ کیا گیا۔ جنوبی کشمیر کے قاضی گنڈ اور پہلگام میں درجہ حرارت بالترتیب منفی 6.5 اور منفی 7.6 ڈگری سیلسیس ریکارڈ کیا گیا، جو معمول سے خاصا کم تھا۔
دیگر علاقوں میں بھی خودکار موسمیاتی سٹیشنز کے ذریعے منجمد درجہ حرارت ریکارڈ کیا گیا۔ بڈگام میں منفی 3.6 ڈگری، بارہمولہ میں منفی 2.6 ڈگری، اور پلوامہ میں منفی 5.1 ڈگری سیلسیس ریکارڈ ہوا۔
جنوبی کشمیر کے شوپیاں اور کولگام خطے کے سب سے سرد علاقوں میں شامل رہے، جہاں بالترتیب منفی 8.0 ڈگری اور منفی 6.6 ڈگری سیلسیس ریکارڈ کیا گیا۔
جموں صوبہ میں کم سے کم درجہ حرارت نسبتا زیادہ رہا لیکن سردی کا اثر برقرار تھا۔ جموں میں 7.1 ڈگری سیلسیس، بانہال میں 0.2 ڈگری، بھدرواہ میں منفی 0.6 ڈگری، اور کٹرا میں 6.1 ڈگری سیلسیس کم از کم درجہ حرارت ریکارڈ کیا گیا۔
وادی ان دنوں ’’چلہ کلان‘‘ کے زیر اثر ہے، جو 21 دسمبر سے شروع ہونے والا سردیوں کا سخت ترین دورانیہ ہے۔ 40 دنوں پر محیط یہ عرصہ درجہ حرارت میں نمایاں کمی اور برفباری کے زیادہ امکانات کے ساتھ سال کا سب سے سرد اور مشکل وقت مانا جاتا ہے۔ ’’چلہ کلان‘‘ 30 جنوری کو اختتام پذیر ہوگا۔