عظمیٰ نیوز ڈیسک
نئی دہلی// ایک ملک ایک انتخاب کے حوالے سے بدھ کے روز مشترکہ پارلیمانی کمیٹی (جے پی سی)کا پہلا اجلاس منعقد کیا جائے گا۔ اس اجلاس میں آئین 129نویں ترمیم اور مرکزی زیر انتظام علاقے قانون میں ترمیمی بل 2024پر بحث کی جائے گی۔ یہ اجلاس حکومت کے انتخابی اصلاحات کے منصوبے پر بحث کرنے کیلئے بلایا گیا ہے تاکہ اراکین کو ان بلوں سے واقف کرایا جا سکے۔جے پی سی کی صدارت بی جے پی کے رکن پارلیمنٹ پی پی چوھری کریں گے اور اس کمیٹی میں مجموعی طور پر 39اراکین شامل ہیں، جن میں 27لوک سبھا اور 12راجیہ سبھا کے ارکان ہیں۔ اجلاس میں ان بلز کے مختلف پہلوں پر گفتگو کی جائے گی اور قانون و انصاف کے وزارت کے افسران ان کے اہم نکات پر روشنی ڈالیں گے۔آئین کی ترمیمی بل میں لوک سبھا اور ریاستی اسمبلیوں کے انتخابات کو ایک ساتھ کرانے کے طریقہ کار کو شامل کیا گیا ہے، جبکہ مرکزی زیر انتظام علاقے کے قانون میں ترمیم سے ان علاقوں میں انتخابات کے انعقاد کے طریقے میں تبدیلی کی تجویز دی گئی ہے۔یہ بل 17 دسمبر 2024 کو لوک سبھا میں پیش کیا گیا تھا اور اب جے پی سی ان بلز کی جائزی جائزہ لے کر ان کے اثرات پر سیر حاصل گفتگو کرے گی۔ جے پی سی میں تمام بڑی جماعتوں کے نمائندے شامل ہیں، جن میں کانگریس کی پرینکا گاندھی، بی جے پی کے انوراگ ٹھاکر اور انیل بلونی، ترنمول کانگریس کے کلیان بنرجی اور سماجوادی پارٹی کے دھرمندر یادو جیسے نام شامل ہیں۔
