برفباری کے بعد وادی کشمیر میں بحالی کا کام جاری: وزیر اعلیٰ عمر عبداللہ

سرینگر// جموں و کشمیر کے وزیر اعلیٰ عمر عبداللہ نے پیر کے روز کہا کہ وادی کشمیر میں برفباری کے بعد بحالی کا کام زور و شور سے جاری ہے اور اس پر قریبی نظر رکھی جا رہی ہے۔
اتوار کو وادی کشمیر اور جموں صوبہ کے کچھ علاقوں میں درمیانے سے شدید درجے کی برفباری ہوئی، جس کے باعث کئی علاقوں میں سڑکیں بند ہو گئیں اور بجلی کی فراہمی معطل ہو گئی۔
عمر عبداللہ نے سوشل میڈیا پلیٹ فارم ایکس پر ایک پوسٹ میں کہا، “جموں و کشمیر میں کل (اتوار) ہونے والی برفباری کے بعد، خاص طور پر وادی میں، بحالی کا کام پوری تیزی کے ساتھ جاری ہے اور اس پر قریبی نگرانی کی جا رہی ہے”۔
انہوں نے کہا، “وادی میں موجودہ بجلی کا لوڈ 1,200 میگاواٹ ہے، اور دن گزرنے کے ساتھ یہ مزید بڑھے گا۔ برف صاف کرنے کا کام جاری ہے اور اہم سڑکوں کو فوری ترجیح دی جا رہی ہے”۔
وزیر اعلیٰ نے مزید کہا کہ وزراء سکینہ ایتو، جاوید ڈار، اور وزیر اعلیٰ کے مشیر ناصر اسلم وانی مختلف اضلاع کا دورہ کریں گے تاکہ صورتحال کا جائزہ لے سکیں۔