رام بن میں تعمیراتی کمپنی کے کارکنوں پر حملہ، 8 افراد زیر حراست

رام بن// ضلع رام بن میں بدھ کے روز ایک تعمیراتی کمپنی کے ملازمین کی بس پر حملے کے نتیجے میں چار افراد معمولی زخمی ہوگئے۔ اس واقعے کے بعد آٹھ افراد کو حراست میں لے کر پوچھ گچھ کی جا رہی ہے۔
حکام نے بتایا کہ ماروگ کے قریب ایک ٹنل منصوبے کی طرف جانے والی کمپنی کے ملازمین کی بس کو سری کے علاقے میں نقاب پوش افراد نے روکا اور بس میں داخل ہو کر کارکنوں کو تشدد کا نشانہ بنایا۔
خبر ملتے ہی پولیس جائے وقوع پر پہنچی اور زخمیوں کو ہسپتال منتقل کیا۔ پولیس کے مطابق اس واقعے میں کمپنی کے چار ملازمین زخمی ہوئے ہیں۔
سینئر سپرنٹنڈنٹ آف پولیس (ایس ایس پی) رام بن کلبیر سنگھ نے بتایا کہ آٹھ افراد کو پوچھ گچھ کے لیے حراست میں لیا گیا ہے۔ انہوں نے کہا کہ نامعلوم حملہ آوروں نے تعمیراتی کمپنی کے بعض کارکنوں کو تشدد کا نشانہ بنایا۔
ایس ایس پی نے مزید کہا کہ غیر مقامی کارکنوں کو گھبرانے کی ضرورت نہیں ہے۔ “ہم انہیں تحفظ کا احساس دلانے کے لیے یہاں موجود ہیں”۔
ہماچل پردیش سے تعلق رکھنے والے انجینئر منوج کمار، جو زخمیوں میں شامل ہیں، نے بتایا کہ نقاب پوش افراد نے انہیں دھمکی دی اور کہا کہ وہ رام بن میں کام کیوں کر رہے ہیں، انہیں یہاں سے چلے جانا چاہیے تھا۔
انہوں نے بتایا، “دو افراد نے ہماری بس کو روکا۔ دس سے پندرہ افراد بس میں چڑھ گئے اور ہمیں مارنا شروع کر دیا۔ ہم میں سے چھ یا سات افراد زخمی ہوئے ہیں”۔
انہوں نے کہا، “ہم یہاں کام کرتے ہوئے تحفظ اور سلامتی کا مطالبہ کرتے ہیں”۔