عظمیٰ نیوز سروس
راجوری//فوج نے 23 دسمبر سے 29 دسمبر 2024 تک کوٹرنکہ، راجوری میں مقامی اسکولوں کے لڑکوں کیلئے کرکٹ ٹورنامنٹ کا انعقاد کیا۔ اس ٹورنامنٹ کا بنیادی مقصد نوجوانوں کو مثبت سرگرمیوں میں شامل کرنا، صحت مند طرز زندگی کو فروغ دینا، اور جسمانی فٹنس کی حوصلہ افزائی کرنا تھا۔ٹورنامنٹ میں انڈر 19 طلباء کے لئے ٹی-10 فارمیٹ میں میچز کھیلے گئے۔ اس کے ذریعے علاقے کے نوجوانوں کے درمیان ہم آہنگی کو فروغ دینے کے ساتھ ساتھ بھارتی فوج اور عوام کے درمیان پہلے سے موجود خوشگوار تعلقات کو مزید مضبوط بنانے کا موقع ملا۔ٹورنامنٹ میں مقامی اسکولوں کی چار ٹیموں نے حصہ لیا۔ مقابلے لیگ فارمیٹ میں منعقد کئے گئے، جس میں سبھی ٹیموں نے جوش و خروش اور کھیل کی روح کا مظاہرہ کیا۔ سیمی فائنلز کے بعد دو بہترین ٹیمیں فائنل تک پہنچیں۔فائنل میچ گورنمنٹ ہائی سیکنڈری اسکول بدھل اور گورنمنٹ ڈگری کالج کوٹرنکہ کے درمیان کھیلا گیا۔ سنسنی خیز مقابلے کے بعد گورنمنٹ ہائی سیکنڈری اسکول بدھل نے کامیابی حاصل کی اور فاتح ٹرافی اپنے نام کی۔اس طرح کی سرگرمیاں نوجوانوں کی توانائی کو منفی سرگرمیوں جیسے نشے کے استعمال یا غیر قانونی سرگرمیوں کی طرف جانے سے روکنے میں مددگار ثابت ہوتی ہیں۔ یہ مقابلے نوجوانوں کی مسابقتی صلاحیتوں کو بڑھاتے ہیں اور انہیں جسمانی فٹنس کی اہمیت سمجھنے کی ترغیب دیتے ہیں۔
