جاوید اقبال
مینڈھر // کابینہ وزیر جاوید احمد رانا نے اپنے حلقہ انتخاب کا دورہ کرتے ہوئے ڈاک بنگلہ مینڈھر میں ایک عوامی دربار کا انعقاد کیا، جہاں انہوں نے لوگوں کے مسائل سننے کے ساتھ ساتھ ان کے حل کی یقین دہانی بھی کرائی۔ اس عوامی دربار میں تحصیل کے سبھی اہم افسران موجود تھے، جن کے سامنے مختلف عوامی وفود نے اپنے مسائل پیش کئے۔عوامی دربار کے دوران، جاوید احمد رانا نے کہا کہ حکومت عوامی مسائل کو حل کرنے کے لئے پوری طرح پرعزم ہے اور لوگوں کو حکومت سے جو توقعات وابستہ ہیں، ان پر پورا اترنے کی کوشش کی جائے گی۔ انہوں نے افسران کو ہدایت دی کہ وہ عوام کے مسائل کو اپنی اولین ترجیح میں شامل کریں اور ایسے معاملات کو فوری طور پر حل کریں جو ان کی دسترس میں ہیں۔رانا نے کہا کہ مینڈھر کے عوام کو نہ صرف سرکاری اسکیموں سے فائدہ پہنچایا جائے گا بلکہ ان کے علاقائی ترقیاتی امور پر بھی توجہ دی جائے گی۔ انہوں نے زور دیا کہ ہر جائز مطالبہ پورا کیا جائے گا اور عوام کے مسائل کو کم کرنے کے لئے تمام وسائل بروئے کار لائے جائیں گے۔جاوید رانا نے اپنی بات کو دہراتے ہوئے کہا کہ وہ ہمیشہ عوامی خدمت کو اپنی ترجیح سمجھتے ہیں اور آج بھی ان کے بنیادی مقاصد میں عوام کی فلاح و بہبود شامل ہے۔ انہوں نے کہا کہ مینڈھر کے لوگ حکومت سے ترقیاتی منصوبوں اور بنیادی سہولیات کے حوالے سے جو امیدیں رکھتے ہیں، ان پر عمل درآمد کیا جائے گا۔اس عوامی دربار میں مختلف وفود نے جاوید رانا کے سامنے اپنے مسائل رکھے، جن میں پانی کی قلت، بجلی کی ناقص فراہمی، خراب سڑکوں، اور طبی سہولیات کی کمی شامل تھیں۔ کئی مقامی رہنماؤں اور وفود نے علاقے میں تعلیمی سہولیات کو بہتر بنانے اور سرکاری اسکیموں کے تحت مزید فنڈز کی فراہمی کی بھی درخواست کی۔وزیر موصوف نے ان مسائل کو انتہائی سنجیدگی سے سنا اور افسران کو ہدایت دی کہ فوری طور پر عوام کے مسائل حل کیے جائیں۔ انہوں نے کہا کہ وہ ذاتی طور پر تمام مسائل کی نگرانی کریں گے اور اس بات کو یقینی بنائیں گے کہ کوئی بھی جائز مطالبہ نظر انداز نہ ہو۔جاوید رانا نے کہا کہ حکومت کی مختلف اسکیمیں، جیسے پردھان منتری آواس یوجنا، منریگا، اور اجولا یوجنا، عوام کے لئے شروع کی گئی ہیں، اور ان کا مقصد عوام کو زندگی کی بنیادی سہولیات فراہم کرنا ہے۔ انہوں نے کہا کہ افسران کو چاہیے کہ وہ ان اسکیموں کو بہتر طریقے سے عمل میں لائیں تاکہ زیادہ سے زیادہ لوگوں کو فائدہ پہنچے۔عوام نے وزیر کی طرف سے دی گئی یقین دہانیوں پر اطمینان کا اظہار کیا اور کہا کہ انہیں امید ہے کہ ان کے مسائل جلد حل ہوں گے۔
