سی آر پی ایف جموں و کشمیر، شمال مشرق میں امن کی بحالی میں شاندار کردار ادا کر رہی ہے: امت شاہ

نئی دہلی// مرکزی وزیر داخلہ امت شاہ نے بدھ کے روز کہا کہ سنٹرل ریزرو پولیس فورس (سی آر پی ایف) نے نکسلیزم کے خاتمے اور شمال مشرقی ریاستوں اور جموں و کشمیر میں امن و استحکام کی بحالی میں قابل تعریف کام کیا ہے۔
شاہ نے کہا کہ سی آر پی ایف ملک میں داخلی سلامتی اور امن کو یقینی بنانے میں اہم کردار ادا کر رہی ہے۔
یہ بات انہوں نے سی آر پی ایف کے ہیڈکوارٹر کے دورے کے دوران کہی، جہاں انہوں نے فورس کے ڈائریکٹر جنرل انیش دیال سنگھ سمیت دیگر اعلیٰ افسران سے ملاقات کی۔
دورے کے دوران، وزیر داخلہ نے دنیا کی سب سے بڑی نیم فوجی فورس کی آپریشنل اور انتظامی کارکردگی کا جامع جائزہ لیا۔
امت شاہ نے کہا کہ سی آر پی ایف نے نکسلیزم کے خلاف جنگ اور جموں و کشمیر اور شمال مشرقی ریاستوں میں امن و استحکام قائم کرنے میں شاندار خدمات انجام دی ہیں۔
سی آر پی ایف کے سربراہ نے وزیر داخلہ کو شہید جوانوں کے خاندانوں کے لیے نافذ کیے جانے والے مختلف فلاحی منصوبوں سے آگاہ کیا، جن میں سی آر پی ایف میں ہمدردانہ تقرریاں بھی شامل ہیں۔
امت شاہ نے فورس کی روزمرہ کی کارروائیوں میں ہندی کے فروغ پر زور دیتے ہوئے لسانی اتحاد کو مضبوط کرنے کی اہمیت پر زور دیا۔
انہوں نے جوانوں کو صحت مند زندگی کے لیے زیادہ سے زیادہ ‘شری ان’ (ملیٹس) کے استعمال اور آیوروید کے فوائد کو اپنانے کی بھی ترغیب دی۔ انہوں نے جوانوں سے ‘پرکرتی ابھیان’ میں شرکت کی اپیل کی، تاکہ ہر فرد اپنی جسمانی ساخت کے مطابق صحت کی بہتر بصیرت حاصل کر سکے۔
وزیر داخلہ کے دورے سے قومی سلامتی میں سی آر پی ایف کی خدمات اور قوم کی تعمیر میں اس کے کثیر الجہتی کردار کے حکومتی اعتراف کو تقویت ملی ہے۔
اس ملاقات میں وزارت داخلہ کے کئی اعلیٰ افسران بشمول مرکزی داخلہ سکریٹری گووند موہن بھی موجود تھے۔