عظمیٰ ویب ڈیسک

سرینگر// جموں و کشمیر اپنی پارٹی (جے کے اے پی) کے صدر سید محمد الطاف بخاری نے نیشنل کانفرنس کے سینئر رہنما اور رکن پارلیمنٹ آغا روح اللہ مہدی کی ریزرویشن پالیسی کے خلاف احتجاجی کال کو “سیاسی ڈرامہ بازی” قرار دیا۔
بخاری نے کہا کہ یہ ایک رکن پارلیمنٹ کی جانب سے غیر سنجیدہ رویہ ہے کہ وہ عوامی مسائل پر اپنی ہی قیادت کے ساتھ بات کرنے کے بجائے احتجاج کا راستہ اختیار کر رہا ہے۔
الطاف بخاری نے کہا کہ آج کے دور میں عوام اتنے سمجھدار ہیں کہ وہ حقیقی کوششوں اور سیاسی تماشوں کے درمیان فرق کر سکتے ہیں۔
مایکروبلاگنگ ویب سائٹ ایکس (سابقہ ٹوئٹر) پر الطاف بخاری نے کہا، “یہ عوام کی عام سمجھداری کی توہین ہے کہ جب ایک رکن پارلیمنٹ اپنی پارٹی صدر سے براہ راست بات کرنے کے بجائے، ان کے خلاف کھلے خطوط لکھ کر اور احتجاج کر کے اپنی ہی پارٹی کی قیادت کے خلاف موقف اختیار کرے”۔
انہوں نے مزید کہا، “ایسی سیاسی ڈرامہ بازی کے دن اب گزر چکے ہیں۔ عوام اتنے ذہین ہیں کہ وہ حقیقی کوششوں اور ڈرامائی اقدامات کے درمیان فرق سمجھ سکیں۔ عوام کی ذہانت کو کم سمجھنا، جو آپ کی اپنی ذہانت سے کہیں زیادہ ہے، نہایت غیر دانشمندانہ اور بے ادبی ہے”۔