عظمیٰ ویب ڈیسک

سرینگر// حکام نے جمعہ کے روز رام بن کو دستی صفائی سے پاک ضلع قرار دینے کے حوالے سے اعتراضات طلب کیے ہیں۔ حکام نے کہا کہ اعتراضات کو تحریری طور پر ضلع سوشل ویلفیئر آفیسر، رام بن کے دفتر میں 15 دنوں کے اندر جمع کرایا جائے۔
ضلع مجسٹریٹ رام بن کی جانب سے جاری کیے گئے ایک حکم میں کہا گیا ہے، “سپریم کورٹ کے 20 اکتوبر 2023 کے حکم اور حکومت ہند کی جانب سے یکم فروری 2024 کو دستی صفائی کرنے والوں کے سروے کے لیے جاری کردہ ہدایات کے تحت، رام بن ضلع میں دستی صفائی کرنے والوں کا سروے کیا گیا اور اس دوران ضلع میں کوئی بھی دستی صفائی کرنے والا نہیں پایا گیا”۔
اس کے مطابق، “اس اعلان کے بارے میں عوام یا دعوے داروں سے اعتراضات طلب کیے جاتے ہیں۔ ایسے اعتراضات تحریری طور پر ضلع سوشل ویلفیئر آفیسر، رام بن کے دفتر میں 15 دنوں کے اندر جمع کرائے جائیں”۔
مزید کہا گیا ہے، “اعتراضات ذاتی طور پر جمع کرائے جا سکتے ہیں یا ای میل کے ذریعے [email protected] پر بھیجے جا سکتے ہیں۔ مذکورہ مدت کے دوران اگر کوئی اعتراض موصول نہ ہوا ، تو ضلع کو باضابطہ طور پر دستی صفائی سے پاک ضلع کے طور پر نوٹیفائی کر دیا جائے گا”۔