عظمیٰ ویب ڈیسک

راجوری// ضلع راجوری میں لائن آف کنٹرول (ایل او سی) کے قریب دو مشتبہ منشیات سمگلروں کو گرفتار کیا گیا اور ان کے قبضے سے 5.50 کلوگرام ہیروئن برآمد کی گئی ہے۔
ذرائع کے مطابق، بین الاقوامی مارکیٹ میں اس ہیروئن کی قیمت کروڑوں روپے بتائی جا رہی ہے۔
یہ کاروائی نوشہرہ سیکٹر میں کی گئی، جس کے نتیجے میں سرحد پار سے منشیات کی سمگلنگ کی کوشش کو ناکام بنا دیا گیا۔
انہوں نے بتایا کہ گرفتار افراد کی شناخت سجن کمار (25 سال) اور سُبہاش چندر (36 سال) کے طور پر کی گئی ہے۔ ان کو اتوار کی رات دیر گئے شِیر اور کنیتی نامی سرحدی دیہات میں فوج اور پولیس کی مشترکہ کارروائی کے دوران گرفتار کیا گیا۔
انہوں نے کہا کہ بارڈر سیکیورٹی فورس (بی ایس ایف) نے ہفتے کے روز جموں کے آرنیا سیکٹر میں بین الاقوامی سرحد کے قریب ایک پاکستانی ڈرون اور تقریباً نصف کلو اعلیٰ معیار کی منشیات بھی برآمد کی تھی۔
ذرائع نے بتایا کہ یہ گرفتاریاں اور برآمدگیاں اس بات کی نشاندہی کرتی ہیں کہ سرحد پار سے منشیات کی سمگلنگ کی کوششیں جاری ہیں، تاہم بھارتی سیکیورٹی فورسز اس حوالے سے مستعدی کے ساتھ اپنی ذمہ داریاں نبھا رہی ہیں۔