عظمیٰ نیوز سروس
جموں//مرکزی حکومت نے جموں و کشمیر میں وائل پل کے قریب سے پاندچھ سے منی گام تک 4 لین ہائی وے کی تعمیر اور اپ گریڈیشن کے لیے 827.98 کروڑ روپے کے پروجیکٹ کو منظوری دی ہے۔یہ اعلان سڑک، ٹرانسپورٹ اور ہائی ویز کے مرکزی وزیر نتن گڈکری نے کیا۔ ایکس پر ایک پوسٹ میں، وزیر نے کہا کہ 12.11 کلومیٹر پر محیط وائل برج کے قریب پاندچھ سے منی گام تک 4 لین ہائی وے کی تعمیر اور اپ گریڈ کے لیے 827.98 کروڑ روپے منظور کیے گئے ہیں۔ انہوں نے کہا کہ اس پروجیکٹ میں ایک بڑا پل، تین چھوٹے پل، تین ریلائنمنٹس، اور 51 باکس کلورٹس شامل ہیں، اس کے ساتھ ساتھ گاندربل ٹائون سے گزرنے والا 2.55 کلومیٹر فلائی اوور بھی شامل ہے، یہ سرینگر رنگ روڈ (فیز-IIA)کا حصہ بھی ہوگا۔ انہوں نے کہا کہ یہ شاہراہ لیہہ اور کرگل جانے والے سیاحوں اور دفاعی گاڑیوں کے لیے رابطے میں نمایاں اضافہ کرے گی۔ انہوں نے مزید کہا کہ یہ منصوبہ اہم خطوں تک رسائی کو ہموار کریگا، علاقائی سلامتی کو فروغ دے گا اور مجموعی طور پر سفری کارکردگی کو بہتر بناکرسیاحت کو فروغ دینے کا حامل ہوگا۔
