عظمیٰ نیوزسروس
نئی دہلی//اگرچہ ہم جموں و کشمیر میں حکومت نہیں بنا سکے، لیکن قانون ساز اسمبلی کے انتخابات میں بی جے پی کا ووٹ شیئر حکمراں جماعت نیشنل کانفرنس سے زیادہ رہا۔ اس کی وجہ یہ ہے کہ ہمیں زیادہ ووٹ ملے لیکن کچھ سیٹیں بہت کم فرق سے ہار گئے۔ مسلم اکثریتی وادی کشمیر میں ہمارے ووٹ شیئر میں بھی نمایاں اضافہ ہوا ہے۔یہ بات مرکزی وزیر ڈاکٹر جتیندر سنگھ نے یہاں بھارت منڈپم میں “ٹائمز ناؤ” کے زیر اہتمام “انڈیا اکنامک کانکلیو” میں کہی۔ایک سوال کے جواب میں، ڈاکٹر جتیندر سنگھ نے کانگریس پارٹی پر الزام لگایا کہ وہ وادی کشمیر کے لوگوں میں بی جے پی کے بارے میں غلط فہمیاں پھیلا رہی ہے جیسا کہ اس نے شمال مشرق میں کیا تھا، لیکن اب، شمال مشرق کے لوگوں کی طرح،جموں و کشمیر بھر کے لوگوں نے یہ محسوس کرنا شروع کر دیا ہے کہ بی جے پی واحد پارٹی ہے جو بغیر کسی امتیاز کے سب کو انصاف فراہم کر سکتی ہے۔ ڈاکٹر جتیندر سنگھ نے یاد کرتے ہوئے کہا کہ ایک وقت تھاجب وادی کشمیر میں بی جے پی کا نام لینا ممنوع تھالیکن آج کشمیر میں بی جے پی کی انتخابی مہم وہی منظر پیش کر رہی ہے جو ملک کے کسی دوسرے حصے میں ہے۔ کانکلیو کے مرکزی موضوع پر آتے ہوئے معیشت، ڈاکٹر جتیندر سنگھ نے کہاکہ 2047ے ہدف کو حاصل کرنے اور ہندوستان کو ایک عالمی رجحان بنانے کے لیے، ہمیں عالمی حکمت عملیوں اور پیرامیٹرز پر عمل کرنے کی ضرورت ہے۔ہندوستان کے خلائی، سمندری اور ہمالیائی وسائل، جو کہ وزیر اعظم نریندر مودی کے اقتدار سنبھالنے سے پہلے ناکافی طور پر تلاش کیے گئے تھے، ہندوستان کی مستقبل کی اقتصادی ترقی میں کافی حصہ ڈالیں گے۔اس سوال کا جواب دیتے ہوئے کہ ہندوستان تخلیقی ترقی کے معاملے میں مستقبل میں اپنے قدرتی وسائل سے کیسے فائدہ اٹھا سکتا ہے، وزیر موصوف نے کہا کہ وزیر اعظم نریندر مودی نے خلائی سیکٹر کو نجی کھلاڑیوں کے لیے کھول دیا ہے جس سے فائدہ اٹھانے کا کافی موقع ہے۔ڈاکٹر جتیندر سنگھ نے کہا، ہندوستان اپنے خلائی سیکٹر کو عالمی معیار تک بڑھانے کی راہ پر گامزن ہے۔ انہوں نے بتایا کہ ہندوستان نے خلائی معیشت میں 2014سے لمبی چھلانگ ماری ہے۔ڈاکٹر جتیندر سنگھ نے کہا کہ 2035تک ہندوستان کے پاس اپنا خلائی اسٹیشن ہوگا۔مرکزی وزیر نے کہا کہ ہمیں غیر دریافت شدہ علاقوں کو تلاش کرنے کی ضرورت ہے۔ وسائل، صلاحیت، عزم اور جذبے کی کوئی کمی نہیں ہے۔جموں و کشمیر کے بارے میں پوچھے جانے پر، ڈاکٹر جتیندر سنگھ نے کہا، حالیہ اسمبلی انتخابات میں بی جے پی کی کارکردگی اب تک کی سب سے اچھی رہی ہے اور “ہمارا ووٹ شیئر نہ صرف بڑھ گیا ہے بلکہ وہاں کی حکمران پارٹی سے ہمارا ووٹ شیئر زیادہ ہے”۔انہوں نے کہا کہ وادی کشمیر میں 2 کروڑ سے زیادہ سیاحوں کا آنا معمول کی واپسی کا ثبوت ہے۔
