محمد اظہر فاضل
بھاگتے وقت کے منظر پر نظریں جمی تو سامنے ایک مکمل دنیا تھی۔جو مختلف رنگوں کے ساتھ رواں دواں تھی۔انسانی سروں کا ٹھاٹھیں مارتاسمندر دیکھ کر اپنے نحیف سے وجود کی حیثیت منوانے چل پڑا۔سمندر سے اٹھتی اونچی اونچی لہروں میں اس نے دیکھا کہ انسانیت چہرہ در چہرہ مختلف اسباب کے آئینے میں کہیں چھپ سی گئی ہے۔کہیں دکھ کے گرداب ہے تو کہیں سکون میں بے چینی ہے کہیں پر کمزوروں کی ان کہی فلک چیرتی بے سود آوازیں ہیں تو کہیں آسودہ ہونے کی موہوم سی آس ہے۔پھر بھی کارجہاں دراز ہے اسکے ذہن کے دریچوں میں سوالات ابھرتے جاتے ہیں وہ چند قدم اور بڑھاتا ہے تو پاتا ہےکہ باشعور نفوس کے بے شعور مشغلے، ملت کے لایعنی رتجگے، نشہ کی رسیا بنتی نسل نو، ہوٹلوں کا بڑھتا رجحان، بے بس، کمزور اور عیش کوشی میں عافیت کی چادر تانے برسوں دھول کی شال میں دھنستی زندگی رقصاں تھی۔بھلا ایک کمزور بشر اتنے محاذوں پر کیسے لڑتا۔۔۔!
ذہن اور آنکھوں کے دریچے میں ایسے ہی نظاروں کو سمونے ہوئے اسکے قدم چلتے چلے جا رہے ہیں۔جہاں اسے معاشی پسماندگی ملی پھر تعلیمی، پسماندگی، اخلاقی، روحانی۔۔۔ یوں ہر گام پر اسے پسماندگیوں کا لامتناہی پہاڑی سلسلہ دراز ہوتا دکھائی دیا،جس میں چھپا بیٹھا تھا صدیوں کا کرب،گھٹن،مردہ احساس،قول و فعل کا تضاد اور کبھی نہ ختم ہونے والی خواہشات کا سفر۔۔۔ان مناظروں کے متواتر نزول کی وجہ سے اسکا ذہن تھک سا گیا تھا۔ صدیوں کی چبھن سہتی زیست کی تھکن آنکھوں سے نیندیں اڑاتی گئی۔زمانے کی روش پر ذہن سوچتا رہا کہ ’’زوال کتوں کے بھونکنے سے نہیں اچھے لوگوں کے خاموش رہنے سے آتا ہے۔‘‘
حوصلے سے بھرے لفظوں نے اسکے ذہن میں ہلچل پیدا کردی۔ تیرگی پر نور پھیلا تخلیق کے اسی مرحلے میں ذہن کو بیدار کرنے کی سوچ اٹھی۔قوت کو یکجا کر بساط بھر کوشش کا اغاز کرتے ہوئے ذہن نے قلم کو تھامنے کا حکم صادر کیا۔اور دیکھتے ہی دیکھتے انکی قلم کی سیاہی سے روشن لفظوں کی ایک مضبوط فوج بنتی چلی گئی۔ لاحاصل، تحفہ، صفت،آخری فیصلہ،ماضی اور حال،منظور خدا،ختم کردو، اپنے عمل سے،دوسرا پل، ضرورت ہوتی ہے، اپنے عمل سے، روشنی کے بعد اس جیسے کئی عنوانات کو متعین کرتے ہوئے انکی قلم نے قلبی وارداتوں کو ایک کے بعد ایک تحریر کرنا شروع کردیا اور یوں دل کا غبار افسانچے اور منی کہانیاں کی شکل میں وارد ہوا۔منی کہانی اور افسانچوں کی فوج تیار کرنے کے بعد وہ اسے اس ٹڈی دل اذہان کے میدان پر اتارنے کے لئے تیار ہے۔ش شکیل اورنگ آباد اس لفظی فوج کا کمانڈر ہے ۔ادب کے میدان پر انکے لفظوں کی فوج کہاں تک اور کتنے ذہنوں کو فتح کرنے میں کامیاب ہوتی ہے یہ تو آنے والا وقت ہی طے کرے گا۔
ش شکیل اورنگ آبادی جانتے ہیںکہ دنیا میں انقلابات تحریروں کے مرہون منت رہے ہیںاور اپنے قلب میں اٹھتے سینکڑوں جذبات و احساسات کو انھوں نے قرطاس کے حوالے کردینا مناسب سمجھا۔اپنے سینے میں محسوس ہوتی دھڑکنوں کی تکالیف کو انھوں نے بساط بھر قلمی طاقت سے مجتمع کیا ہے اور لکھ بیٹھے زعم کے ساتھ کہ نہ میں لکھاری ہوں، نہ قلمکار ہوں، نہ انشائیہ نگار ہوں، نہ افسانہ نگار ہوں، نہ افسانچہ نگار ہوں، نہ مضمون نگار نہ شاعر ہوں، نہ ادیب ہوں اور نہ ہی ناقد ہوں۔لیکن ان سب باتوں سے خود کو دور رکھتے ہوئے انھوں نے یہ بتانے کی کوشش کی ہےکہ میں تو بس ’’ایک زندہ انسان ہوں۔‘‘افسانچوی مجموعہ’’سرگوشیاں‘‘ ادب میں انکی بہتر پیش رفت ہے۔’’ سرگوشیاں‘‘ دنیا دیکھنے کا انکا اپنا نظریہ ہے، وہ اپنے نظریہ میں کہاں تک کامیاب ہے یہ کتاب اور قاری طے کریں گے۔انکی قلمی جدو جہد اور ادبی کاوشیں سر آنکھوں پر۔میری نیک خواہشات انکے ساتھ ہے۔قاری افسانچوی مجموعہ ’’سرگوشیاں ‘‘کو سکون سے سمجھے، اسی سبب منی کہانیوں اور افسانچوں پر بحث نہیں کر سکا۔انکی سرگوشیاں جلد ہی مکمل سماج کی سرگوشیاں بن جائیں اسی خواہش کے ساتھ قلم کو روکتا ہوں۔اللہ ہی ہمارا حامی و ناصر ہے۔
(رابطہ۔8999032902)
[email protected]
