عظمیٰ ویب ڈیسک

جموں// جموں و کشمیر کے ضلع کٹھوعہ میں گہری دھند چھانے کے باعث سیکورٹی فورسز نے جمعرات کو پاکستان کے ساتھ سرحدی علاقوں میں سرچ آپریشن شروع کر دیا ہے۔
حکام نے بتایا کہ یہ کارروائی ممکنہ دراندازی یا ڈرون کے ذریعے اسلحہ کی ترسیل کے خدشات کے پیش نظر کی گئی ہے۔
جموں و کشمیر پولیس کے خصوصی آپریشن گروپ نے ضلع کی بین الاقوامی سرحد (آئی بی) کے ساتھ مختلف علاقوں میں تلاشی مہم جاری رکھی ہے۔ حکام نے اس بات پر زور دیا کہ گھنی دھند کے دوران دراندازی کا خطرہ بڑھ جاتا ہے۔
بارڈر سیکورٹی فورس (بی ایس ایف) نے پہلے سے ہی آئی بی کے ساتھ ایک جامع سکیورٹی نظام قائم کیا ہوا ہے تاکہ دراندازی کی کوششوں کو ناکام بنایا جا سکے۔
حکام نے مزید کہا کہ بی ایس ایف کے سکیورٹی نظام کے علاوہ، دوسرے درجے کی حفاظت سرحدی پولیس اور تیسرے درجے میں دیہی دفاعی گروپ شامل ہیں جو کہ ایک مربوط اینٹی انفلٹریشن سسٹم کا حصہ ہیں۔