عاصف بٹ
کشتواڑ//حکام نے جمعہ کو کہاکہ ضلع کشتواڑ میں امن و امان کے قیام اور عوام کی حفاظت کو یقینی بنانے کیلئے ضلع مجسٹریٹ کشٹواڑ راجیش کمار شاون نے سخت کارروائی کرتے ہوئے 5خطرناک مجرموں پر پبلک سیفٹی ایکٹ کے تحت اقدامات کیے ہیں۔جے کے این ایس کے مطابق پبلک سیفٹی ایکٹ کے تحت کارروائی کی زدمیںآنے افراد میں محمد عبداللہ گجر ولد حاجی نبی بخش گجر ساکنہ سگڈی بھٹا، نور دین ولد حبیب گجر ساکن کاکڑواگن، غلام نبی ولد عبدالغنی چپن ساکنہ ترنگی (دچھن)، محمد جعفر شیخ ولد غلام محمد شیخ ساکنہ نٹاس (ڈول) اور محمد رمضان ولد میر زمان ساکنہ ڈنگڑوڑو (دچھن) شامل ہیں۔ضلع مجسٹریٹ کشتواڑ نے اپنے عہدہ سنبھالنے کے فوراً بعد اعلان کیا تھا کہ جرائم پیشہ افراد کے خلاف سخت اقدامات کیے جائیں گے تاکہ ریاست میں امن قائم رہے اور عوام کا تحفظ یقینی بنایا جا سکے۔ ان افراد کا ماضی میں غیر سماجی اور ملک دشمن سرگرمیوں میں ملوث ہونے کا ریکارڈ رہا ہے، اور وہ اپنے غیر قانونی اقدامات سے باز نہیں آ رہے تھے۔ ان کے بارے میں یہ تشویش ظاہر کی جا رہی تھی کہ یہ عوامی نظم و ضبط کو بگاڑنے اور ریاست کی سلامتی کے لیے خطرہ بن سکتے ہیں۔گرفتاری کے وارنٹ ملنے کے بعد ضلع پولیس نے فوری کارروائی کرتے ہوئے ان افراد کو گرفتار کر لیا اور متعلقہ قانونی کارروائیاں عمل میں لائیں۔ اس کے علاوہ، ضلع مجسٹریٹ نے حکام کو ہدایت دی ہے کہ کم از کم22 مزید افراد کو بھی نظر میں رکھا جائے جو قومی مفادات کے منصوبوں میں رکاوٹ ڈالنے کی کوششیں کرتے ہیں اور عوامی امن کو متاثر کرنے کے لیے سازشیں کرتے ہیں۔ یہ افراد جھوٹی پروپیگنڈہ کے ذریعے ملک مخالف سرگرمیوں کو بڑھاوا دیتے ہیں اور اہم ترقیاتی منصوبوں کی رفتار سست کرنے کی کوشش کرتے ہیں۔یاد رہے کہ کشٹوار ضلع ایک حساس علاقے کے طور پر جانا جاتا ہے جہاں حالیہ عرصے میں دہشت گردی کی وارداتیں پیش آئی ہیں، اور یہ اقدام ضلع کی سکیورٹی کو مستحکم کرنے کی کوششوں کا حصہ ہے۔
