عاصف بٹ
کشتواڑ// بی جے پی کی واحد خاتون امیدوار شگن پریہار نے کشتواڑ اسمبلی حلقے سے کامیابی حاصل کی۔ شگن پریہار نے سینئر نیشنل کانفرنس رہنما اور سابق وزیر سجاد احمد کچلو کو شکست دی۔پریہار ان 29بی جے پی امیدواروں میں سے ایک ہیں جو انتخابات میں کامیاب ہوئے ہیں اور وہ جموں و کشمیر میں کامیاب ہونے والی تین خواتین میں بھی شامل ہیں۔ پریہار نے 29,053ووٹ حاصل کیے اور کچلو کو 521 ووٹوں کے قریب فرق سے شکست دی۔ انہوں نے ووٹ شماری کے عمل کے دوران مسلسل برتری برقرار رکھی۔کچلو جنہوں نے 2002 اور 2008 میں یہ سیٹ جیتی تھی، نے 28,532ووٹ حاصل کیے جبکہ پی ڈی پی کے فردوس احمدٹاک نے صرف 997 ووٹ حاصل کیے۔اور وہ ہزار کاہندسہ بھی عبور نہ کرسکے۔ پریہار نے منتخب ہونے کے بعد صحافیوں سے گفتگو کرتے ہوئے کہا میں کشتواڑ کے لوگوں کے سامنے جھکتی ہوں کہ انہوں نے مجھ پر اور میری پارٹی پر اعتماد کیا، ان کی حمایت کا دل سے شکریہ ،میں ان کے اعتماد کے لئے شکر گزار ہوں۔انہوں نے یہ عزم کیا کہ علاقے کی سیکورٹی کو یقینی بنانا ان کی اولین ترجیح ہوگی ۔اُنہوں نے کہاکہ میری لوگوں سے درخواست ہے کہ وہ علاقے میں امن، ترقی اور خوشحالی کی کوشش کریں، میں علاقے کی حفاظت اور سیکورٹی کے لیے کام کروں گی۔ہزاروں کی تعداد میں بی جے پی کارکنان کشتواڑ میں جمع ہوئے اور شگن کی کامیابی پرروایتی ڈھول بجائے اور پارٹی کے جھنڈے لہرائے۔ انہوں نے سنیل شرما کی پاڈر ناگسینی کی کامیابی کا بھی جشن منایا۔بی جے پی نے 29سالہ پریہار کو اس کے والد اور چچا کی ملی ٹینٹ حملے میں ہلاکت کے پانچ سال بعد پہلی بار میدان میں اتاراتھا ۔ وہ پہلے کبھی سیاست میں فعال نہیں رہی تھیں۔شگن نے الیکٹرانکس میں ماسٹر آف ٹیکنالوجی کی ڈگری حاصل کی ہے۔
