عظمیٰ نیوز سروس
لیہہ//ٹیکسٹائل کے مرکزی وزیر گری راج سنگھ نے کل راج نواس لیہہ میں لداخ کے لیفٹیننٹ گورنر ڈاکٹر بی ڈی مشرا کو پشمینہ اون کے جغرافیائی اشارے (جی آئی) رجسٹریشن کا سرٹیفکیٹ حوالے کیا۔ ایل جی نے پشمینہ اون کے مجاز صارفین کی رجسٹریشن کی درخواست مرکزی وزیر کو سونپی۔اجتماع سے خطاب کرتے ہوئے مرکزی وزیر نے مرکز کے زیر انتظام علاقے میں ترقی کے نئے معیارات حاصل کرنے کے لیے حکومت کے عزم کو اجاگر کیا۔ انہوں نے کہا کہ حکومت نے پورے لداخ خطے میں لوگوں کی فلاح و بہبود کے لیے متعدد منصوبے اور اقدامات شروع کیے ہیں۔انہوں نے کہا کہ پشمینہ اون کا جی آئی ٹیگ صداقت کے معیار کو برقرار رکھنے جا رہا ہے۔ انہوں نے مزید کہا کہ یہ قدم اس شعبے سے وابستہ افراد کے لیے سود مند ثابت ہوگا۔ انہوں نے اس بات پر روشنی ڈالی کہ حکومت 2030 تک مرکز کے زیر انتظام علاقے میں 500,000 پشمینہ بکریوں اور 10 لاکھ مرینو بھیڑوں کے ہدف تک پہنچنے کا ہدف رکھتی ہے۔اس موقع پر ٹیکسٹائل کی وزارت کے جوائنٹ سکریٹری پراجکتا ورما، سکریٹری ٹیکسٹائل کمیٹی کارتکے ڈھنڈا، ایل جی کے مشیر ڈاکٹر پھون کوتوال اور دیگر بھی موجود تھے۔
