یو این آئی
نئی دہلی//وزیر دفاع راج ناتھ سنگھ نے کہا’’ایئر فورس ملک دشمنوں کو ان کی سرزمین میں گھس کر منہ توڑ جواب دینے کی صلاحیت رکھتی ہے۔ انہوں نے کہا کہ ملک اور اس کے لوگوں کی حفاظت کیلئے اپنی کوششوں میں فضائیہ نے اہم کامیابیاں حاصل کی ہیں۔وزیر دفاع نے ہندوستانی فضائیہ کی 92 ویں سالگرہ کے موقع پر منعقد کیے جانے والے مختلف پروگراموں کے ایک حصے کے طور پر نیشنل وار میموریل سے ‘وایو ویر وجیتا’ کار ریلی کو منگل کو الوداع کیا ۔راجناتھ نے کہا وزیر اعظم نریندر مودی کی قیادت میں ہم ہندوستانی فضائیہ کو جدید ترین طیاروں اور پلیٹ فارمز سے لیس کرنے کیلئے پرعزم ہیں اور انہیں آتم نربھر بھارت پہل کے ذریعے مزید قابل بنا رہے ہیں۔سنگھ نے اس ریلی میں حصہ لینے والے فضائی جنگ بازوں کے لیے نیک خواہشات کا اظہار کیا جو مشکل اور پیچیدہ خطوں سے گزرے گی۔وزیر دفاع نے کہا کہ اس ریلی میں خواتین سمیت 50سے زیادہ فضائی جنگجو لداخ کے تھوئس کیلئے روانہ ہوئے جہاں سے وہ اروناچل پردیش کے توانگ جائیں گے۔ ریلی 8اکتوبر کو توانگ کیلئے رسمی طور پر روانہ ہوگی۔ تھوئس بیس سطح سمندر سے 3,068میٹر کی بلندی پر دنیا کے سب سے اونچائی والے ایئر فورس اسٹیشنوں میں سے ایک ہے۔یہ ریلی نو ریاستوں اور مرکز کے زیر انتظام علاقوں کے ذریعے کل 7,000کلومیٹر کا فاصلہ طے کرے گی۔ ریلی میں مختلف مراحل میں فضائیہ کے سابق سربراہان کی شرکت بھی دیکھنے کو ملے گی۔ ہوائی جنگ باز29 اکتوبر کو توانگ میں ریلی کے اختتام سے قبل لیہہ، کرگل، سرینگر، جموں، چندی گڑھ، دہرادون، آگرہ، لکھن، گورکھپور، دربھنگہ، باگ ڈوگرا، ہسیمارا، گوہاٹی، تیز پور اور دیرنگ میں رکیں گے۔ریلی کا مقصد لوگوں میں ہندوستانی فضائیہ کی شاندار تاریخ اور بہادری کے بارے میں بیداری پھیلانا اور نوجوانوں کو مادر وطن کی خدمت کی طرف راغب کرنا ہے۔ وزیر دفاع نے کہا کہ کار ریلی کے دوران ایئر واریرس مختلف ریاستوں اور مرکز کے زیر انتظام علاقوں کے اسکولوں اور کالجوں میں نوجوانوں سے بات چیت کریں گے تاکہ نوجوانوں کو مسلح افواج میں شامل ہونے اور فخر اور وقار کی زندگی گزارنے کی ترغیب دی جاسکے۔اس موقع پر چیف آف ایئر اسٹاف ایئر چیف مارشل اے پی سنگھ، سابق چیف آف ایئر اسٹاف آر کے ایس بھدوریا، اے آر وائی ٹپنیس اور دیگر سینئر افسران موجود تھے۔ اس ریلی کا اہتمام فضائیہ نے اتراکھنڈ وار میموریل کے سابق فوجیوں کے ساتھ مل کر کیا ہے۔ انڈین ایئر فورس کا ایڈونچر سیل اس ریلی کی قیادت اور تعاون کر رہا ہے۔
