عظمیٰ نیوزسروس
جموں//یفٹیننٹ گورنر منوج سنہا نے جموں یونیورسٹی میں مالویہ مشن ٹیچر ٹریننگ سینٹر (ایم ایم ٹی ٹی سی) کی نئی عمارت کا افتتاح کیا۔اپنے خطاب میں لیفٹیننٹ گورنر نے کہاکہ یہ سہولت اساتذہ کی صلاحیت اور تربیت میں اضافہ کرے گی اور قومی تعلیمی پالیسی کے اہداف کو حاصل کرنے کے مقصد کے ساتھ جدید تدریسی طریقوں کو تیار کرنے میں مدد فراہم کرے گی۔لیفٹیننٹ گورنر نے کہا”اعلیٰ تعلیم کے متحرک ماحول میں، فیکلٹی ممبران کی استعداد کار میں اضافہ ضروری ہے۔ قائدانہ صلاحیتیں، مسلسل پیشہ ورانہ ترقی ہندوستانی علمی نظام کے ساتھ مربوط جامع اور کثیر الضابطہ تعلیم کے لیے کلید ثابت ہوگی‘‘۔ انہوں نے کہا کہ مالویہ مشن ٹیچر ٹریننگ پروگرام کے تحت ٹیچر ٹریننگ سینٹرز قومی تعلیمی پالیسی2020کے ساتھ منسلک ہیں تاکہ پوری انسانی صلاحیت حاصل کی جا سکے تاکہ اعلیٰ تعلیمی ادارے ایک منصفانہ اور انصاف پسند معاشرے کی تعمیر اور ترقی میں اپنا حصہ ڈال سکیں۔اس موقع پر لیفٹیننٹ گورنر نے مہامانا پنڈت مدن موہن مالویہ کو خراج عقیدت پیش کیا اور ہندوستان کے تعلیمی نظام میں ان کی اہم شراکت کو یاد کیا ۔لیفٹیننٹ گورنر نے اعلیٰ تعلیمی اداروں پر زور دیا کہ وہ تدریسی طریقوں میں معیار اور عمدگی کو شامل کرکے تعلیم کے معیار کو بہتر بنائیں۔ انہوں نے کہا کہ ہمیں اساتذہ کی مسلسل پیشہ ورانہ ترقی اور صلاحیتوں اور قائدانہ صلاحیتوں کو یقینی بنانا چاہیے۔لیفٹیننٹ گورنر نے جدید تعلیمی پروگرام شروع کرنے اور قومی تعلیمی پالیسی کی سفارشات کے مطابق زندگی بھر سیکھنے اور 21ویں صدی کے ہنر کے فریم ورک پر توجہ دینے کے ساتھ تنقیدی سوچ، تخلیقی صلاحیتوں، اختراعات اور تعاون جیسے اہم پہلوؤں پر خصوصی توجہ دینے کے لیے جموں یونیورسٹی کی بھی تعریف کی۔
لیفٹیننٹ گورنر کی ماتا ویشنو دیوی مندر میں حاضری | بھون میں نئی یگیہ شالا کا اِفتتاح کیا،امن و خوشحالی کیلئے دعا کی
عظمیٰ نیوزسروس
کٹرہ//لیفٹیننٹ گورنر منوج سِنہا نے ماتا ویشنو دیوی مندر میں حاضری دی اور جموںوکشمیر یوٹی کے اَمن ، خوشحالی اور ترقی کے لئے دعا کی ۔اُنہوں نے اَپنے دورے کے دوران بھون میں نئی یگیہ شالا کی سہولیت کا اِفتتاح کیا اور عقیدتمندوں کے لئے وقف کیا۔یگیہ شالا مذہبی منظر نامے کا ایک لازمی حصہ ہے، بھون میں روحانی طریقوں کو بڑھانے کے لئے احتیاط سے ڈیزائن اور تعمیر کیا گیا ہے۔ یہ عقیدتمندوں کی مذہبی ضروریات کو پورا کرے گا۔مرکزی بھون میں نئی تعمیر شدہ یگیہ شالہ اٹکا علاقے کے نیچے پرانے غسل گھاٹ کے قریب واقع ہے ،پانچ ہاون کنڈوں پر مشتمل ہے جو 1,600 مربع فٹ پرپھیلے ہوئے ہیں۔ یہ وسیع ڈیزائن گنجائش میں تین گنازیادہ ہے ۔ یاتریوں کے 10 گروپوں کو بیک وقت ہاون پوجن کرنے کی اجازت ملتی ہے جو تین گروپوں کی سابقہ حد سے زیادہ ہے۔مزید برآں، 1,100 مربع فٹ کے احاطہ شدہ علاقے کے ساتھ ایک اپروچ گیلری بنائی گئی ہے جو یگیہ شالا تک جاتی ہے۔ اِس گیلری میں نوراترا کے دوران باقاعدگی سے منعقد ہونے والے شات چندی مہایگیہ کے دوران 100سے زیادہ یاتری رہ سکتے ہیں۔اِس موقعہ پرلیفٹیننٹ گورنر کے پرنسپل سیکرٹری ڈاکٹر مندیپ کمار بھنڈاری، سی اِی اوشری ماتا ویشنو دیوی شرائین بورڈ انشل گرگ، ضلع ترقیاتی کمشنر رِیاسی وشیش پال مہاجن، ایس ایس پی رِیاسی موہتا شرما، شرائین بورڈ کے اَفسران اور عقیدتمندوں کی بڑی تعداد موجود تھی۔
