عظمیٰ ویب ڈیسک

جموں// اپنی پارٹی کی طرف سے اپوزیشن کی میٹنگ میں شامل ہونے کی دعوت قبول کرنے کے بعد، کانگریس پارٹی نے بھی 7 اگست کو ہونے والی میٹنگ میں شرکت کرنے کا فیصلہ کر لیا ہے۔
جموں و کشمیر کانگریس کے سربراہ وقار رسول وانی نے بتایا کہ انہیں اس میٹنگ کے لیے دعوت نامہ موصول ہوا ہے جو 7 اگست کو جموں میں ہونے والی ہے۔
وانی نے کہا کہ پارٹی جموں و کشمیر کے وسیع تر مفاد کے لیے میٹنگ میں شرکت کرے گی۔
انہوں نے کہا کہ ریاست کا درجہ بحال کرنا ہمارا اولین مطالبہ ہے جسے 05 اگست 2019 کو نئی دہلی نے یکطرفہ طور پر چھین لیا تھا۔ “ریاست کا ہونا ہمارے لیے بنیادی تشویش ہے۔ وزیراعلیٰ کی کرسی کو بے اختیار کرنے جیسے دیگر مسائل کی اہمیت بہت کم ہے۔ بی جے پی نے جموں و کشمیر کے لوگوں کو بورڈ میں شامل کیے بغیر دفعہ370 اور 35 (A) کو منسوخ کردیا، اور ہماری ریاستی حیثیت کو چھین لیا اور ہمارے خطے کو دو مرکز کے زیر انتظام علاقوں میں تقسیم کر دیا۔ نیز جموں و کشمیر کے لوگ پچھلے آٹھ سالوں سے اپنے منتخب نمائندوں کے بغیر ہیں۔ ہم اس بات کا اعادہ کرتے ہیں کہ انتخابات بغیر کسی تاخیر کے کرائے جائیں”۔
اسی طرح دیگر سیاسی جماعتوں کے قائدین بشمول ڈاکٹر فاروق عبداللہ (این سی)، محبوبہ مفتی (پی ڈی پی)، کانگریس، سی پی آئی (ایم)، سجاد لون (پی سی)، مظفر شاہ (اے این سی) اور دیگر کو بھی اجلاس کے منتظمین کی جانب سے دعوت نامہ موصول ہوا ہے۔
ذرائع نےبتایا کہ رہنماؤں نے جموں و کشمیر کے وسیع تر مفاد کے لیے میٹنگ میں شرکت کے لیے اپنی رضامندی ظاہر کی ہے۔
جمعہ کو سابق وزیر سید محمد الطاف بخاری کی قیادت میں جموں و کشمیر اپنی پارٹی کو بھی دعوت نامہ موصول ہوا اور انہوں نے مذکورہ میٹنگ میں شرکت کے لیے اپنی رضامندی کی تصدیق کی۔
اے پی کے سینئر نائب صدر غلام حسن میر نے کہا تھا کہ ان کی پارٹی کو دعوت نامہ موصول ہوا ہے اور وہ اجلاس میں شرکت کریں گے۔
ذرائع نے واضح کیا کہ مذکورہ میٹنگ کا پی اے جی ڈی سے کوئی تعلق نہیں ہے اور یہ خالصتاً اپوزیشن کی میٹنگ ہے جہاں جموں و کشمیر اور اس کے عوام سے متعلق مسائل پر بات چیت کی جائے گی۔