عظمیٰ نیوز ڈسیک
نئی دہلی//سماعت کے دوران درخواست گزاروں کے وکیل نے نام کی تختی لگانے کے حکم کا حوالہ دیتے ہوئے کہا کہ پہلے دو ریاستوں نے ایسا کیا، اب مزید دو ریاستیں ایسا فیصلہ کرنے جا رہی ہیں۔ بلدیہ کے بجائے پولیس کارروائی کر رہی ہے۔ اقلیتوں اور دلتوں کو الگ تھلگ کیا جا رہا ہے۔ وکیل نے سب سے پہلے مظفر نگر پولیس کا حکم پڑھا، جس پر جسٹس ہرشی کیش رائے نے پوچھا کہ یہ حکم ہے یا پریس ریلیز؟ وکیل نے کہا کہ میں پریس ریلیز پڑھ رہا ہوں۔ اس میں لکھا ہے کہ ماضی میں کانوڑ یاتریوں کو غلط چیزیں کھلا دی گئیں، اس لیے دکاندار کا نام لکھنا لازمی قرار دیا جا رہا ہے۔ جب آپ سبزی، خالص سبزی، جین فوڈ وغیرہ لکھ سکتے ہیں تو بیچنے والے یا دوکاندار کا نام لکھنا کیوں ضروری ہے؟اس پر جج نے کہا کہ اس میں تو رضاکارانہ لکھا ہے۔ اس پر دوسری درخواست گزار مہوا موئترا کے وکیل ابھیشیک منو سنگھوی نے کہا کہ یہ رضاکارانہ نہیں ہے بلکہ لازمی ہے۔ ایڈوکیٹ سی یو سنگھ نے کہا کہ پولیس کو ایسا کرنے کا کوئی قانونی حق نہیں ہے۔ دیکھئے ہری دوار پولس کا حکم، جس میں کہا گیا ہے کہ سخت کارروائی کی جائے گی۔ یہ ہزاروں کلومیٹر کا راستہ ہے۔ لوگوں کا ذریعہ معاش متاثر کیا جا رہا ہے۔ ایڈووکیٹ ابھیشیک منو سنگھوی نے کہا کہ دکاندار اور عملے کے نام لکھنا ضروری کر دیا گیا ہے۔ یہ شناخت کی بنیاد پر اخراج (بائیکاٹ) ہے۔نام نہ لکھو تو کاروبار بند، نام لکھو تو فروخت ختم۔ جس پر جسٹس بھٹی نے کہا کہ معاملے کو بڑھا چڑھا کر نہ پیش کیا جائے۔ حکم سے پہلے مسافروں کی حفاظت کا بھی خیال رکھا گیا ہوگا۔ایڈووکیٹ ابھیشیک منو سنگھوی نے کہا کہ مسلمان، عیسائی، بدھ سبھی ان یاتریوں کے کام آتے رہے ہیں۔آپ خالص سبزی (شودھ شاکاہاری) لکھنے پر اصرار کر سکتے ہیں، دکاندار کے نام پر نہیں۔ انہوں نے کہا کہ اس کے ذریعے معاشی بائیکاٹ کی کوشش کی جا رہی ہے۔ اچھوت کو بھی فروغ دیا جا رہا ہے۔ ایڈووکیٹ سی یو سنگھ نے کہا کہ دیکھیں، اجین میں بھی انتظامیہ نے دکانداروں کے لیے ایسی ہدایات جاری کی ہیں۔ جسٹس رائے نے کہا کہ کیا کانوڑیٔے اس بات کی توقع کر سکتے ہیں کہ کھانا کسی خاص برادری کی دکان کا ہو اور اناج کسی خاص برادری کا ہی پیدا کردہ ہو؟ اس پر سنگھوی نے کہا کہ یہی ہماری دلیل ہے۔جسٹس بھٹی نے کہا کہ کیرالہ کے ایک شہر میں 2 مشہور ویجیٹیرین ریسٹورنٹ ہیں۔ ایک ہندو کا ہے اور ایک مسلمان کا ہے۔ مجھے ذاتی طور پر مسلمان کے ریسٹورنٹ میں جانا پسند تھا کیونکہ وہاں صفائی زیادہ نظر آتی تھی۔ اس پر سنگھوی نے کہا کہ فوڈ سیکورٹی ایکٹ بھی صرف ویجیٹیرین-نان ویجیٹیرین اور کیلوریز لکھنے کی بات کرتا ہے۔ مینوفیکچرنگ کمپنی کے مالک کا نام لکھنے کی ضرورت نہیں۔ سنگھوی نے کہا کہ کانوڑ یاترا 6 اگست کو ختم ہوگی۔ اس لیے ان احکامات کو ایک دن کے لیے بھی جاری رکھنا غلط ہے۔سماعت کے بعد جج نے کہا کہ ہم نے درخواست گزاروں کی جانب سے تمام سینئر وکلاء کو سنا۔ انہوں نے 17 جولائی کی مظفر نگر پولیس کی ہدایات کو چیلنج کیا ہے اور اس کے بعد کی گئی پولیس کارروائی پر احتجاج بھی کیا گیا ہے۔ جج نے کہا کہ اس ہدایت سے تنازعہ کھڑا ہوا ہے۔ ہم نے ہندی میں جاری کردہ ہدایات اور اس کا انگریزی ترجمہ دیکھا۔ اس میں لکھا ہے کہ ساون کے مقدس مہینے میں گنگا کا پانی لانے والے کانوڑیٔے کچھ اقسام کے کھانوں سے دور رہنا چاہتے ہیں۔ بہت سے لوگ پیاز اور لہسن بھی نہیں کھاتے۔ جج نے کہا کہ دکانداروں سے کہا گیا ہے کہ وہ اپنے نام اور اپنے ملازمین کے نام لکھیں۔ درخواست گزار اسے مذہبی بنیادوں پر امتیازی اور اچھوت کو فروغ دینے والا قرار دے رہے ہیں۔ وہ کہتے ہیں کہ صرف ویجیٹیرین اور نان ویجیٹیرین لکھنا کافی ہے۔
