عظمیٰ نیوز سروس
سرینگر// لیفٹیننٹ گورنر منوج سنہا نے بدھ کو کہا کہ مرکز کے زیر انتظام علاقے کے لوگوں کو پرسکون رہنا چاہیے کیونکہ انتظامیہ اور سیکورٹی فورسز اس وقت تک آرام نہیں کریں گے جب تک دہشت گردی اور اس کے حامیوں کو جموں و کشمیر کی سرزمین سے ختم نہیں کیا جاتا۔ ایل جی سنہا نے ایس کے آئی سی سی میں جموں و کشمیر آرٹ کلچر اینڈ لینگویجز کے زیر اہتمام منعقدہ فوک فیسٹیول سے خطاب کرتے ہوئے کہا کہ ریاسی حملہ جس میں9افراد ہلاک اور 33زخمی ہوئے، نے معاشرے کے سبھی طبقوںمیں بڑے پیمانے پر غصے کو جنم دیا ہے۔ انہوں نے کہا “لوگوں میں غصہ حقیقی ہے،عوام کو پولیس اور سیکورٹی فورسز کی عظیم بہادری، حوصلے اور ذہانت پر اعتماد ہونا چاہیے، ہم جموں و کشمیر کی سرزمین سے دہشت گردی اور اس کے حامیوں کو جڑ سے اکھاڑ پھینکنے تک آرام سے نہیں بیٹھیں گے‘‘۔
انہوں نے کہا کہ فنکار فن کی مختلف شکلوں کو انجام دیتے ہوئے اپنی آگاہی مہم کے ذریعے دہشت گردی کے ماحولیاتی نظام کی حمایت یا مدد کرنے والے عناصر کو بے نقاب کر سکتے ہیں۔ایل جی نے شہریوں پر زور دیا کہ وہ دہشت گردی کو کچلنے کے لیے قانون نافذ کرنے والے اداروں کو کوئی بھی اہم معلومات فراہم کریں۔انہوں نے کہا کہ ہمیں دہشت گردی کے خلاف جنگ میں متحد ہونا چاہیے۔انکا کہنا تھا کہ معاشرے کے لیے دہشت گردی کے ماحولیاتی نظام کے مذموم ڈیزائن کو ناکام بنانا ناگزیر ہے جو دہشت گردی کی کارروائیوں کی مدد اور حوصلہ افزائی کر رہا ہے۔انہوں نے کہا کہ ہمیں امن میں خلل ڈالنے کی کوشش کرنے والے عناصر کی شناخت اور الگ تھلگ کرنے کے لیے مل کر کام کرنا چاہیے۔انکا کہنا تھا کہ مجھے اپنی پولیس اور سیکورٹی فورسز پر پورا بھروسہ ہے جو لوگوں کے لیے محفوظ ماحول کو یقینی بنانے کے لیے چوبیس گھنٹے کام کر رہے ہیں۔لیفٹیننٹ گورنر ٹیگور ہال میں جشن بہار روایتی لوک میلے میں فنکاروں سے خطاب کر رہے تھے۔انہوں نے کہا کہ تنوع میں اتحاد ہماری سب سے بڑی طاقت ہے۔ انہوں نے کہا کہ ہم میں سے ہر ایک کو جموں کشمیر اور قوم کے پرامن اور خوشحال مستقبل کے لیے دہشت گرد عناصر کو ختم کرنے میں اپنی ذمہ داری پوری کرنی چاہیے۔
