یو این آئی

غزہ// وسطی غزہ پٹی میں نصرت کیمپ میں بے گھر افراد کی رہائش والے اسکول کو نشانہ بنانے والے اسرائیلی فضائی حملے میں 30 فلسطینی ہلاک اور متعدد زخمی ہوگئے۔
ہلاک ہونے والوں میں زیادہ تر بچے اور خواتین شامل ہیں۔ طبی شعبے سے وابستہ ذرائع نے جمعرات کی صبح چین کی خبر رساں ایجنسی ژنہوا کو بتایا کہ ایک اسرائیلی لڑاکا طیارے نے کم از کم تین کلاس رومز پر بمباری کی۔

وہیں حماس کے زیر انتظام غزہ حکومت کے میڈیا آفس نے ایک بیان میں اسکول پر اسرائیلی حملے کی مذمت کرتے ہوئے اسے ایک خوفناک قتل عام قرار دیا اور کہا کہ اسرائیلی فوج کا ان حملوں کا تسلسل نسل کشی کے جرم کا واضح ثبوت ہے۔

دفتر نے کہا کہ اسرائیل اور امریکہ کو ان جرائم کی پوری ذمہ داری قبول کرنی چاہیے جو انسانیت کو خطرے میں ڈالتے ہیں اور بین الاقوامی قوانین کی خلاف ورزی کرتے ہیں۔ اسرائیلی جانب سے ابھی تک اس واقعے پر کوئی رد عمل سامنے نہیں آیا ہے۔