عظمیٰ نیوز سروس
سرینگر //پولیس نے کہا ہے کہ سیاسی جماعتوں کے بیانات اور قیاس آرائیاں کہ پولیس دوسرے کے کہنے پر ان کی پارٹی کے کارکنوں کو مختلف طریقوں سے ہراساں کر رہی ہے، بے بنیاد ہے۔ایک بیان میں کہا گیا’’ جموں و کشمیر پولیس آزادانہ اور منصفانہ انتخابات کو آگے بڑھانے میں سیکورٹی سے متعلق قانون اور الیکشن ضابطہ اخلاق کے رہنما خطوط کو نافذ کرنے کے لیے پرعزم ہے، جماعتی وابستگی سے قطع نظر خلاف ورزیوں سے متعلق کارروائیاں کی گئی ہیں جیسے کہ نقدی، منشیات، شراب کی ضبطی اور دہشت گردی اور علیحدگی پسندی سے تعلق رکھنے والے شرپسندوں اور ممکنہ مجرموں کے خلاف انسدادی کارروائیاں‘‘۔ جموں و کشمیر پولیس اور اس کی قیادت امیدواروں اور سیاسی کارکنوں، ان کے قیام کی جگہوں، سیاسی جلسوں، روڈ شوز کو تحفظ فراہم کرنے کے لیے پرعزم ہے، چاہے وہ کسی بھی پارٹی سے تعلق رکھتا ہو، کیونکہ وہ انتخابات کو مقدس سمجھتی ہے اور اس میں حصہ لینے والے تمام امیدوار یکساں طور پر مقدس ہیں اور وہ بھی،ہم مل کرایک مشترکہ مخالف کا سامنا کرتے ہیں۔ تاریخ اس کی گواہی دیتی ہے کہ مشترکہ وجہ اور ہر طرف کی قربانیوں کے باوجود، پولیس پر تنقید کو ہمیشہ پیشہ ورانہ خطرہ کے طور پر قبول کیا گیا ہے۔ تاہم، قیاس آرائی پر مبنی بیانات جب انفرادی پولیس افسران کے خلاف بنائے جاتے ہیں اور عوامی ڈومین میں ڈالے جاتے ہیں، تو یہ فرد کو سیکورٹی کے خطرات سے دوچار کرتا ہے جیسا کہ ماضی میں دیکھا گیا ہے۔ اس کے باوجود، ہم قانون کے غیر جانبدارانہ نفاذ کے لیے اپنی لگن اور عزم کا اعادہ کرتے ہیں۔
