عظمیٰ ویب ڈیسک

جموں// لوک سبھا انتخابات کے پیشِ نظر پیر کو جموں میں ایک سیکورٹی جائزہ میٹنگ منعقد ہوئی جس دوران پرامن انتخابات کو یقینی بنانے، سازگار اور محفوظ ماحول کو یقینی بنانے کی حکمت عملی پر غور کیا گیا۔
جموں پارلیمانی سیٹ پر دوسرے مرحلے میں 26 اپریل کو پولنگ ہو رہی ہے۔
پولیس ترجمان نے بتایا کہ ضلع پولیس لائنز میں سینئر سپرنٹنڈنٹ آف پولیس (جموں) ونود کمار کی صدارت میں ہونے والی میٹنگ میں پولنگ سٹیشنوں، انتخابی اہلکاروں اور ووٹروں کی حفاظت کیلئے سیکورٹی اہلکاروں کی تعیناتی اور تال میل، کسی بھی ناخوشگوار واقعے یا رکاوٹ کو روکنے کے لیے سخت حفاظتی پروٹوکول کے نفاذ پر بھی تفصیلی تبادلہ خیال کیا گیا۔
انہوں نے کہا کہ کسی بھی ابھرتے ہوئے سیکیورٹی چیلنجز یا خطرات سے نمٹنے کے لیے متعلقہ حکام اور سٹیک ہولڈرز کے ساتھ تعاون، امن و امان کی بحالی، انتخابی بددیانتی یا غیر قانونی سرگرمیوں کی کسی بھی کوشش کے خلاف چوکسی جو انتخابی عمل کی سالمیت کو نقصان پہنچا سکتی ہے، پر بھی تبادلہ خیال کیا گیا۔
ترجمان نے کہا کہ پولیسنگ کے مختلف پہلووں بشمول مقدمات کی کوالٹی انویسٹی گیشن، کرائم ڈسپوزل، تصدیق، نارکوٹک ڈرگس اینڈ سائیکوٹرپک سبسٹنسز (این ڈی پی ایس) اور غیر قانونی سرگرمیاں (روک تھام) ایکٹ کیسز، تفتیشی کارروائی، مفرور اور لاپتہ افراد اور احتسابی پولیسنگ سے متعلق دیگر امور شامل تھے۔
ایس ایس پی نے افسران کو ہدایت دی کہ وہ زیر تفتیش مقدمات کو مقداری اور معیاری نمٹانے کو یقینی بنائیں۔
ایس ایس پی نے زور دے کر کہا کہ جواب میں جلد بازی کے ساتھ ساتھ عوام کے مسائل سے نمٹنے کے لیے شائستہ رویے اور دل میں ہمدردی کی ضرورت ہے۔