یو این آئی

سرینگر// کشمیر صوبے کے کنگن، کپواڑہ اور حاجن میں آتشزدگی کی تین الگ الگ وارداتوں میں دو رہائشی مکان اور ایک شیڈ خاکستر ہوا ہے۔
فائر اینڈ ایمرجنسی محکمہ کے ایک سینئر عہدیدار نے یو این آئی اردو کو بتایا کہ شمالی ضلع بانڈی پورہ کے حاجن علاقے میں درمیانی شب رہائشی مکان سے آگ نمودار ہوئی جس نے آناً فاناً مکان کو لپیٹ میں لے لیا۔
انہوں نے بتایا کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں آگ پر قابو پایا گیا تاہم آتشزدگی کی اس واردات میں رہائشی مکان پوری طرح سے خاکستر ہوا ہے۔
وسطی کشمیر کے نائر کنگن علاقے میں اتوار کی دوپہر رہائشی مکان سے آگ نمودار ہونے کی اطلاع ملتے ہی فائر اینڈ ایمرجنسی کے اہلکار جائے موقع پر پہنچے۔
معلوم ہوا ہے کہ فائر اینڈ ایمرجنسی عملے کی بروقت کارروائی کے نتیجے میں آگ کو مزید پھیلنے سے روک دیا گیا۔
دریں اثنا کپواڑہ میں اتوار کے روز آگ کی ایک واردات میں شیڈ خاکستر ہوا ہے۔
پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ہے۔