عظمیٰ نیوز سروس
سرینگر// انسداد بدعنوانی بیورو (اے سی بی) نے جمعرات کو سرینگر میں غیر متناسب اثاثہ جات کیس کے سلسلے میں تلاشی لی۔ سرکاری ترجمان نے بتایا کہ اے سی بی نے آمدنی سے زیادہ اثاثے کے الزام میں نامزد انسپکٹر امیت کمار کیخلاف پولیس سٹیشن اے سی بی سینٹرل جموں میں درج ایف آئی آر نمبر/2024 1 کے سلسلے میں سرینگر میں تلاشی لی۔ اُنہوں نے بتایا، ’’قابل اعتماد معلومات کی بنیاد پر، اے سی بی ٹیم نے بٹ گیسٹ ہاؤس راج باغ میں تلاشی کارروائی انجام دی،جہاں سے انسپکٹر (ایس) امیت کمار کول کے زیر استعمال کمرے میں مختلف برانڈز کی شراب کی 58 بوتلیں برآمد ہوئیں”۔ ترجمان نے مزید کہا کہ تلاشیاں ایگزیکٹو مجسٹریٹ اور آزاد گواہوں کی موجودگی میں کی گئیں۔ اُنہوں نے کہا، ’’شراب کی بوتلوں کے اتنے بڑے ذخیرے کے منظر عام پر آنے کے بعد، معاملے کو رسمی طور پر ایس ایچ او پولیس سٹیشن راجباغ، سرینگر کے پاس بھیج دیا گیا تاکہ ایف آئی آر کے ذریعے الگ قانونی کارروائی شروع کی جا سکے‘‘۔
