مودی نے جموں و کشمیر کی تعمیر نو کی اور دہشت گردی کا خاتمہ کیا:امت شاہ
سرینگر// مرکزی وزیر داخلہ امت شاہ نے بدھ کو کہا کہ نریندر مودی حکومت نے جموں و کشمیر کی تعمیر نو کی ، دہشت گردی اور تشدد کے دور کو ختم کیا ہے اور بڑے پیمانے پر بنیادی ڈھانچے اور فلاحی اسکیموں کو آگے بڑھا کر ترقی کو پنکھ دیا ہے۔’ پرگتی شیل جموں کشمیر‘ہیش ٹیگ کے ساتھ، انگریزی اور ہندی دونوں زبانوں میں X پر پوسٹس کی ایک سیریز میں، شاہ نے یہ بھی کہا کہ وزیر اعظم مودی نے نوجوانوں میں ایک نئی امید جگا کر جموں و کشمیر کو بدل دیا۔انہوں نے کہا کہ مودی حکومت نے نوجوانوں کے خوابوں کو محفوظ بنایا اور تعلیم اور ہنر مندی کی سہولیات کو مضبوط کرکے ان کی امنگوں کو نئی اڑان دی۔انہوںنے کہا کہ مودی حکومت نے جموں و کشمیر کو دوبارہ تعمیر کیا اور دہشت گردی اور تشدد کے دور کا خاتمہ کیا۔انہوں نے کہا کہ مودی حکومت نے بڑے پیمانے پر بنیادی ڈھانچے اور فلاحی اسکیموں کو آگے بڑھا کر جموں و کشمیر کی ترقی کو پنکھ دیا اور آج یہ بھارت کی طاقتور جمہوریت کی قابل فخر گواہی کے طور پر کھڑا ہے۔
وزیر داخلہ نے کہا کہ جموں و کشمیر کی ثقافت ملک کی سب سے قدیم اور امیر ترین ثقافتوں میں سے ایک ہے اور مودی حکومت کے تحت مرکز کے زیر انتظام علاقے کے ثقافتی ورثے کو زندہ کیا جا رہا ہے اور اس کا ثقافتی فخر ایک بار پھر بڑھ رہا ہے۔انہوں نے یہ بھی الزام لگایا کہ جموں و کشمیر کے لوگ خاندانی سیاست کی وجہ سے ترقی سے دور رہے ۔شاہ نے کہا کہ مودی حکومت نے مرکز کے زیر انتظام علاقے میں پنچایتی راج نظام کو مضبوط کیا ہے جس کا مقصد نچلی سطح پر ترقی فراہم کرنا ہے، حکمرانی کو خاندان سے آزاد کرنا اور اسے عام لوگوں تک پہنچانا ہے۔وزیر داخلہ نے کہاکہ وزیر اعظم نریندر مودی کی قیادت میں جموں و کشمیر اب راحت کی سانس لے رہا ہے۔ آرٹیکل 370 کو ختم کرنے کے بعد، مودی حکومت نے صفر برداشت کی پالیسی کے ساتھ دہشت گردی کو کچل کر وادی میں زندگی کا وقار حاصل کیا ہے۔اسی طرح X پر ایک پوسٹ میں، شاہ کے دفتر نے کہا کہ جموں و کشمیر ایک طویل عرصے سے دہشت گردی اور انتہا پسندی کے ساتھ جدوجہد کر رہا ہے۔پوسٹ میں کہا گیا ہے کہ مودی حکومت نے آرٹیکل 370 کو ختم کرکے جموں و کشمیر میں امن و استحکام قائم کیا، جس کے نتیجے میں مرکز کے زیر انتظام علاقہ ترقی اور خوشحالی کی راہ پر آگے بڑھ رہا ہے۔مودی حکومت کی پالیسیوں کی وجہ سے جموں و کشمیر کے نوجوانوں کی تصویر بدل گئی ہے اور وہ اب علیحدگی پسندی نہیں بلکہ ترقی میں شامل ہو رہے ہیں۔اس میں کہا گیا ہے کہ جموں و کشمیر میں 2023 میں پتھر بازی کا ایک بھی واقعہ پیش نہیں آیا۔شاہ کے دفتر نے کہا کہ مودی حکومت نے جموں و کشمیر میں جمہوریت کی جڑوں کو مضبوط کرنے کے لیے پنچایتی راج نظام کو بحال کیا، جس کی وجہ سے حکمرانی عام لوگوں کے ہاتھ میں آ گئی ہے اور پورے خطے میں ترقی کے ایک نئے دور کا آغاز ہوا ہے۔
