عظمیٰ ویب ڈیسک
جموں// جموں و کشمیر کے لیفٹیننٹ گورنر منوج سنہا نے بدھ کو نگروٹا کے سینک سکول کے سالانہ دن کی تقریب میں شرکت کی اور اس موقع پر ادارے کی انتظامیہ، طلباءاور اساتذہ کو مبارکباد دی۔
لیفٹیننٹ گورنر نے مزید کہا کہ سینک سکول نگروٹہ نے ہمیشہ اپنے “گیان، ویرتا اور انوشاسن” کے نعرے پر عمل کیا ہے – علم، بہادری اور نظم و ضبط اور اس کے سابق طلباءدیگر مختلف شعبوں میں ملک کی ممتاز خدمات انجام دے رہے ہیں۔
اُنہوں نے کہا،”تعلیم مستقبل کے لیڈروں کی پرورش کرتی ہے۔ وہ مہتواکانکشی بھارت کی علامت ہیں، ایک علمی معاشرہ بنانے اور دنیا میں بھارت کی اقتصادی صلاحیت کو آگے بڑھانے کے لیے پرعزم ہیں“۔
انہوں نے تعلیمی اداروں، تدریسی برادری پر زور دیا کہ وہ قوم کی تعمیر کے نظریات کو تقویت دیں اور نوجوانوں کو ترقی پسند ہندوستان کے سفیروں میں تبدیل کریں۔
انہوں نے کہا کہ ہمیں اس بات کو یقینی بنانا ہے کہ ہمارا تعلیمی نظام ثقافت اور اخلاق کو مضبوط کرے اور ایک مضبوط، خوشحال اور وکشت بھارت بنانے کے لیے بااختیار ہو۔
لیفٹیننٹ گورنر نے طلباءکو مشورہ دیا کہ وہ زندگی کی مہارتوں پر توجہ مرکوز کریں، اپنی اندرونی آواز تلاش کریں، اپنے تجربات اور تعاون سے سیکھیں۔
انہوں نے کہا کہ نظم و ضبط، مضبوط کردار اور چیلنجوں پر قابو پانے کے لیے خود اعتمادی آپ کو ایک شاندار مستقبل کی طرف رہنمائی کرے گی۔
لیفٹیننٹ گورنر نے سینک سکول کو ضروری مدد فراہم کرنے کیلئے یو ٹی انتظامیہ کے عزم کا اعادہ کیا۔
انہوں نے سینک سکول نگروٹہ کے کیڈٹس کو بھی مبارکباد دی جنہوں نے این ڈی اے کے باوقار امتحان میں شاندار کارکردگی کا مظاہرہ کیا۔
اس موقع پر، لیفٹیننٹ گورنر نے 21.38 لاکھ روپے کی لاگت والی 32 نشستوں والی اسکول بس، جو یو ٹی انتظامیہ کی طرف سے سپانسر کی گئی تھی، سینک اسکول کے حکام کے حوالے کی۔
قبل ازیں لیفٹیننٹ گورنر نے طلباءسے رسمی گارڈ آف آنر حاصل کیا اور کیڈٹس کو تعلیمی اعزازات پیش کئے۔
انہوں نے آرٹس اینڈ سائنس نمائش کا بھی افتتاح کیا اور اسکول کی آئی ٹی کمپیوٹر لیب اور اٹل ٹنکرنگ لیب کا بھی دورہ کیا۔
طلباءنے قومی یکجہتی اور سماجی مسائل کو اجاگر کرنے کے موضوع پر دلکش پرفارمنس پیش کی۔
لیفٹیننٹ جنرل سنجیپ جین، جی او سی 16 کور نگروٹا؛ میجر جنرل شیلیندر سنگھ، چیف آف اسٹاف اور چیئرمین لوکل بورڈ آف ایڈمنسٹریشن؛ کیپٹن (آئی این) اے کے دیسائی، پرنسپل سینک اسکول نگروٹہ؛ فوج اور یو ٹی انتظامیہ کے اہلکار؛ اساتذہ، طلباءاور والدین موجود تھے۔
