عظمیٰ نیوز سروس
جموں// جموں و کشمیر بھارتیہ جنتاپارٹی یونٹ کے صدر رویندر رینہ نے بدھ کے رو ز کہا کہ مرکز کے زیر انتظام علاقے میں بھاجپا اگلے سال ہونے والے لوک سبھا انتخابات میں سبھی نشستوں پر جیت حاصل کرئے گی۔انہوں نے کہاکہ اپوزیشن پارٹیوں کا سیاسی وجود معدوم ہونے کے دہانے پر ہے۔ان باتوں کا اظہار موصوف نے جموں میں پارٹی کنونشن سے خطاب کے دوران کیا۔انہوں نے کہاکہ آنے والے پارلیمانی انتخابات میں بی جے پی ایک دفعہ پھر حکومت بنانے میں کامیاب ہو جائے گی۔ان کے مطابق جموں وکشمیر کی سبھی نشستوں پر بی جے پی امیدواروں کی جیت یقینی ہے کیونکہ ان پانچ سالوں کے دوران بھاجپا نے لوگوں کے مسائل حل کئے ہیں۔ بھارتیہ جنتا پارٹی جموںو کشمیر کے چیف رویندر رینہ کا کہنا ہے کہ حزبِ اختلاف کا وجود خاتمے کے باکل قریب ہے اور جلد ہی اس کا صفایا ہو جائے گا۔ بھارتیہ جنتا پارٹی (بی جے پی)، جموں و کشمیر نے صدر رویندر رینہ کی قیادت میں جموں شمالی ضلع کے رائے پور ڈومانہ منڈل کے گاؤں کوٹ میں “بوتھ جن سمواد ابھیان” کا انعقاد کیا۔ بی جے پی کے جنرل سکریٹری اشوک کول، ڈی ڈی سی چیئرمین بھارت بھوشن جموں شمالی ضلع کے صدر اومی کھجوریہ، منڈل صدر اشوک کیرنی نمایاں رہنماؤں میں موجود تھے۔رویندر رینہ نے سمیلن سے خطاب کرتے ہوئے کہا کہ انتخابات میں اپنی شکست کے خوف سے اپوزیشن پارٹیاں جھوٹے بیانات دے رہی ہیں اور کسی نہ کسی بہانے بی جے پی کو نشانہ بنا رہی ہیں لیکن حقیقت یہ ہے کہ ان کا سیاسی وجود ختم ہونے کے دہانے پر ہے۔ انہوں نے کہا کہ بی جے پی کی پوری قیادت اور اس کا وقف کیڈر ہمیشہ عوام میں ہوتا ہے جو اس پارٹی کو مقبول اور عوام کی پہلی پسند بنا رہا ہے۔ رینہ نے کہا،” بوتھ جن سمواد ابھیان پروگراموں کا ردعمل زبردست ہے، اس نے دوسری پارٹیوں کو چونکا دیا ہے”۔ اُنہوں نے مزید کہا کہ 2024 کے عام انتخابات ملک کی سیاسی تاریخ میں ایک نیا باب لکھیں گے کیونکہ لوگ حق میں ووٹ دیں گے۔ بی جے پی مودی کو مسلسل تیسری بار پی ایم کے طور پر دیکھے گی۔جموں و کشمیر کے ووٹر اس بات کو یقینی بنانے میں اپنا حصہ ڈالیں گے کہ بی جے پی یہاں بھی لوک سبھا انتخابات میں کلین سویپ کرے گی۔ اشوک کول نے پروگرام سے خطاب کرتے ہوئے کہا کہ جموں و کشمیر کے پورے طول و عرض میں تبدیلی کی لہر دیکھی جا رہی ہے اور لوگ چاہتے ہیں کہ بی جے پی ان کی خدمت کے لیے کرسی پر ہو۔ عوام کو ماضی میں کانگریس اور این سی کی حکومتوں کا بہت تلخ تجربہ ہے اور انہوں نے ان پارٹیوں کو جھوٹے وعدے کرنے اور دھوکہ دینے پر سبق سکھانے کا ارادہ کر لیا ہے۔جن سمواد میں ضلع جنرل سکریٹریز اجے شرما اور سریندر بھگت، منڈل صدور راکیش سنگھ بھلوال اور امیت سنگھ راجپوت، انکش شرما اور دیگر پارٹی کے سرکردہ لیڈران موجود تھے۔اسی طرح کے پروگرام بوتھ نمبر میں مرہ منڈل کی پنچایت چنوں چک کے 17، 18، 19 اور 20 اور مرہ اسمبلی حلقہ کے امب گھروٹا منڈل میں امب پنچایت، اشوک کول، بھارت بھوشن اور دیگر قائدین نے ان پروگراموں سے خطاب کیا۔ پونچھ میں سرگلان، دھرتی اور دھرانہ پنچایتوں میں بھی پروگرام منعقد کیے گئے جن میں علاقوں کے لوگوں نے بڑی تعداد میں شرکت کی۔راجوری کی ڈریری، سوکر اور دبروت پنچایتوں میں مزید پروگرام منعقد کیے گئے۔ اودھم پور میں سوونتھن پنچایت میں پروگرام منعقد ہوا۔جموں جنوبی میں اسی طرح کے پروگرام شاستری نگر اور وارڈ نمبر 3 میں منعقد ہوئے۔
