اظہر حسین
کولگام// کولگام سے تعلق رکھنے والی 18 سالہ مسکان اقبال نے کانسی کا تمغہ جیت کر پینکاک سلاٹ کی دنیا میں قصبے کا نام روشن کیا۔مہاراشٹرا میں منعقدہ قومی سطح کے کھیلوں میں 12ویں جماعت کی طالبہ مسکان نے کامیابی کے سفر میں کئی چیلنجز کا سامنا کرنے کے باوجود مارشل آرٹ کے نظم و ضبط میں قابل ذکر مہارت کا مظاہرہ کیا۔ مسکان نے مہاراشٹر میں منعقدہ قومی سطح کے کھیلوں کے دوران سخت مقابلہ پینکاک سلاٹ میں کانسی کا تمغہ حاصل کیا۔ مسکان نے کوچ اور خصوصی تربیت کے بغیر کبھی ہمت نہیں ہاری۔مسکان کے مطابق انہوں نے پینکاک سلاٹ سے متعلق تربیتی ویڈیوز کیلئے یوٹیوب کا سہارا لیا۔ مسکان کا کہنا ہے کہ خود کی حفاظت ان کی بنیادی قوت ہے۔ اس نے تسلیم کیا کہ مارشل آرٹس ذاتی دفاع، خاص طور پر نوجوان خواتین کیلئے ایک طاقتور ذریعہ ہو سکتا ہے۔ انہوں نے کہا کہ اپنے شاندار سفر کے دوران ان کو اپنے خاندان کی جانب سے غیر متزلزل تعاون ملا۔مسکان کی نگاہیں بین الاقوامی اسٹیج پر اپنے ملک کی نمائندگی کرنے پر مرکوز ہیں۔
