اشرف چراغ
کپوارہ//فوج نے کہا ہے کہ لائن آف کنٹرول پرامسال دراندازی کی8 کوششوں کے دوران 27 ملی ٹینٹ مارے گئے اور ان کے قبضے سے بڑی مقدار میں اسلحہ وگولہ بارود اور منشیات برآمد کیا گیا۔ 28 انفنٹری ڈویژن کے جی او سی گریش کالیہ نے ایک پریس کانفرنس میں کہا کہ کشمیر میں حالات کافی بہتر ہوئے ہیں اور ملی ٹینسی کے واقعات میں بھی غیر معمولی کمی واقع ہوئی ہے۔
گریش کالیہ نے کہاکہ پاکستان کی جانب سے جموں وکشمیر کے پر امن حالات کو درہم برہم کرنے کی کوششیں کی جا رہی ہیں تاہم سیکورٹی ایجنسیاں ملک دشمن عناصر کے منصوبوں کو ناکام بنا رہی ہے۔انہوں نے بتایا کہ سیکورٹی ایجنسیوں کی انتھک کوششوں کے نتیجے میں حالات بہتر ہوئے ہیںجس کی وجہ سے تعمیر وترقی کے ایک نئے دور کا آغاز ہونے کے ساتھ ساتھ سیاحتی شعبہ بھی ترقی کے نئے منازل طے کر رہا ہے۔
جی او سی نے کہا کہ امسال 8 ماہ کے دوران ایل او سی پر8 مرتبہ دراندازی کے واقعات رونما ہوئے، جنہیں سیکورٹی فورسز نے ناکام بنا کر 27ملی ٹینٹوں کو تصادم آرائیوں کے دوران ہلاک کیا۔انہوں نے بتایا کہ مہلوک دہشت گردوں کے قبضے سے بڑی مقدار میں اسلحہ وگولہ بارود اور ممنوع نشیلی اشیاء بھی برآمد کی گئی۔جی او سی نے بتایا کہ مہلوک ملی ٹینٹ کشمیر میں خرمن امن میں آگ لگنے کی منصوبہ بندی کر رہے تھے تاہم جوں ہی وہ اس طرح آئے انہیں ایل او سی پر ہی مار گرایا گیا۔ فوجی کمانڈر نے بتایا کہ جموں وکشمیر پولیس اور فوج نے مشترکہ آپریشن کے دوران مژھل سیکٹر میں دہشت گردوں کے ایک بڑے منصوبے کو ناکام بنایا ہے۔انہوں نے کہاکہ مہلوک دہشت گرد جدید ہتھیاروں سے لیس تھے جس سے یہ صاف ظاہر ہوتا ہے کہ وہ یہاں پر حالات خراب کرنے کی نیت سے اس پار داخل ہوئے۔اس موقع پر ایس ایس پی کپواڑہ یوگل منہاس نے کہاکہ مضبوط انٹیلی جنس گرڈ کی بدولت دہشت گرد وں کے منصوبوں کوناکام بنایا جارہا ہے۔ان کے مطابق فینسنگ کے نزدیک ہی سیکورٹی فورسز کی تعیناتی عمل میں لائی گئی اور جوں ہی ملی ٹینٹوں نے اس طرف آنے کی کوشش کی تو انہیں للکارا گیا جس دوران دبدو گولیوں کا تبادلہ شروع ہوا۔
