عظمیٰ نیوز سروس
کشتواڑ//ضلع انتظامیہ کشتواڑ نے ضلع ترقیاتی کمشنر (انچارج) شام لال کی زیر صدارت لائن ڈپارٹمنٹس کے افسران اور سول سوسائٹی کے ارکان کی میٹنگ میں آئندہ تہوار کے موسم کے انتظامات پر تبادلہ خیال کیا۔ میٹنگ میں نوراتری، رام نومی، چھڑی اور دسہرہ تہواروں کے لیے مجوزہ انتظامات پر تفصیلی بات چیت ہوئی۔ یہ میٹنگ کانفرنس ہال، ڈی سی آفس کمپلیکس، کشتواڑ میں ہوئی۔میٹنگ میں سناتن دھرم سبھا اور آدرش ڈرامیٹک کلب کشتواڑ کے نمائندوں کے ساتھ گہرا تبادلہ خیال کیا گیا جنہوں نے صفائی ستھرائی، بلاتعطل بجلی، پینے کے صاف پانی، حفاظتی انتظامات، ٹریفک کا انتظام، مندروں کی سجاوٹ سمیت مختلف مسائل پر قیمتی تجاویز پیش کیں۔
انہوں نے نرخوں کی جانچ پڑتال اور اشیائے خوردونوش کے معیار پر بھی تبادلہ خیال کیا۔ڈی سی نے صفائی اور حفظان صحت کو برقرار رکھنے کی اہمیت پر زور دیا اور ساتھ ہی تہواروں کے مقامات، مندروں کے اندر اور اس کے ارد گرد مناسب چونا لگانے کو یقینی بنایا اور متعلقہ محکموں کو صفائی کے پیغام کو فروغ دینے کی ہدایت کی۔انہوں نے پولیس حکام سے کہا کہ وہ مندروں پر مناسب حفاظتی انتظامات کریں اور رات کی ضروری چیکنگ کریں۔چیئر نے اس تہوار کو خوش اسلوبی سے منانے کے لیے تمام ضروری انتظامات کو بروقت مکمل کرنے کے لیے بین ڈپارٹمنٹل کوارڈی نیشن پر زور دیا۔انہوں نے پی ایچ ای اور پی ڈی ڈی محکموں سے کہا کہ وہ پانی اور بجلی کی بلا تعطل فراہمی کے لیے تمام اقدامات کریں۔ پی ڈی ڈی سے کہا گیا کہ وہ تہوار کے موسم میں بجلی کی بلا تعطل فراہمی کے علاوہ روشنی کے مناسب انتظامات کو یقینی بنائے اور رام لیلا کے مقام پر جنریٹر سیٹ کی فراہمی کو یقینی بنائے۔فوڈ سول سپلائیز اور کنزیومر افیئرز کے حکام کو ہدایت دی گئی کہ وہ تہوار کے لیے مناسب راشن اور ایل پی جی سلنڈر کو یقینی بنائیں۔ اس کے علاوہ تحصیلدار کشتواڑ کے ساتھ مل کر ان سے کہا گیا کہ وہ میلے کے دوران فروخت ہونے والی اشیائے خوردونوش کے نرخوں اور معیار پر باقاعدگی سے بازار کی چیکنگ کے ذریعے نظر رکھیں۔محکمہ صحت کو طبی سہولیات اور طبی عملے کے لیے خاطر خواہ انتظامات رکھنے کی ہدایت کی گئی۔تہوار کے جلوسوں کے دوران ٹریفک کے فول پروف انتظامات کو یقینی بنانے کے دیگر انتظامات، دسہرہ کے موقع پر چوگان گراو¿نڈ میں رکاوٹیں کھڑی کرنے کے ساتھ ساتھ دیگر ضروری حفاظتی انتظامات پر تبادلہ خیال کیا گیا اور متعلقہ افراد کو ضروری ہدایات دی گئیں۔
