کپوارہ کو ریل لنک کیساتھ جوڑنے کیلئے تکنیکی سروے کیلئے فنڈس مختص
اشرف چراغ
کپوارہ // لیفٹیننٹ گورنر منوج سنہا نے جمعہ کو کہا کہ جموں و کشمیر میں اب تک پردھان منتری آواس یوجنا (PMAY) کے تحت 9000 سے زیادہ بے زمین لوگوں کو زمین فراہم کی گئی ہے۔ڈاک بنگلہ کپواڑہ میں ایک تقریب کے موقع پر صحافیوں سے بات چیت کرتے ہوئے انہوں نے کہا کہ حکومت کی طرف سے صرف ان اہل افراد کو ہی 5 مرلہ زمین ملے گی جو بے زمین ہیں۔لیفٹیننٹ گورنر نے کہا کہ کوئی بھی شخص جس کے پاس اپنی زمین نہیں ہے، جموں و کشمیر حکومت اسے پی ایم اے وائی اسکیم کے تحت 5 مرلہ زمین فراہم کرے گی۔سنہا، جو کپواڑہ ضلع کے دو روزہ دورے پر تھے، نے یہ بھی کہا کہ سرحدی ضلع کو جلد ہی ریل لنک سے جوڑا جائے گا۔انہوں نے کہا “ریلوے کے وزیر نے پہلے ہی ضلع سے منسلک ریل پروجیکٹ کے تکنیکی سروے کے لیے بجٹ کو منظوری دے دی ہے۔ سروے مکمل ہونے کے بعد، تفصیلی پروجیکٹ رپورٹ پیش کی جائے گی”۔ انہوں نے کہا “کپوارہ کو جلد ہی ریل لنک سے جوڑ دیا جائے گا۔”ایل جی نے کہا کہ کپواڑہ خوشحالی اور ترقی کی راہ پر گامزن ہے حالانکہ پچھلے تین سالوں میں سیکورٹی کی صورتحال میں بھی بہتری آئی ہے۔انہوں نے کہا کہ عام آدمی یہاں پر سکون زندگی گزار رہا ہے۔ اس ضلع نے زراعت اور متعلقہ شعبے میں نمایاں بہتری دیکھی ہے،ترقی اور پیداوار دونوں میں اضافہ ہوا ہے۔
سنہا نے کہا کہ بنیادی ڈھانچے کی ترقی میں بھی نمایاں بہتری دیکھی گئی ہے۔انہوں نے کہا”سڑکیں تیار ہو چکی ہیں، دور دراز علاقوں کو سڑکوں سے جوڑ دیا گیا ہے،بجلی کی ترسیل اور تقسیم پر بھی کافی کام کیا گیا ہے، ماضی کے مقابلے میں ہماری طاقت میں کافی حد تک بہتری آئی ہے‘‘۔انہوں نے کہا کہ کپواڑہ سیاحت کے شعبے میں کھل کر سامنے آ رہا ہے اور اس کی مزید ترقی کے لیے بہت کام کیا جا رہا ہے۔ گزشتہ چند سالوں کے دوران بہت سے سیاحوں نے اس جگہ کا دورہ کیا۔لیفٹیننٹ گورنر نے کہا کہ گورنمنٹ میڈیکل کالج جی ایم سی کا قیام بھی ایک بہترین قدم ہے۔سنہا نے کہا کہ ضلع کے وہ علاقے جو 6 ماہ تک بند رہتے تھے اب پہلی بار بجلی دیکھ رہے ہیں۔ انہوں نے کہا کہ سڑکوں کے رابطے، پانی کی فراہمی اور بجلی کا کام اچھی رفتار سے جاری ہے اور ہر گھر کو جوڑنے کا تقریبا 70 فیصد کام مکمل ہو چکا ہے۔لیفٹیننٹ گورنر نے کہا’’اس سال کے آخر تک، 100 فیصد ہدف حاصل کر لیا جائے گا” ۔انہوں نے کہا کہ انتظامیہ شفافیت لانے میں کامیاب رہی ہے اور اس نے عوام کے حامی نقطہ نظر کو اپنایا ہے اور کپواڑہ ضلع میں ترقی کی ایک نئی صبح لکھی جا رہی ہے۔
بلدیاتی نمائندوں، ٹریڈرس اوررہائشیوں سے ملاقات
ضلع میں سرمائی شجرکاری کا آغاز
اشرف چراغ
کپواڑہ// لیفٹیننٹ گورنر منوج سِنہا نے کپوارہ کے اَپنے دورے کے دوسرے دِن عوامی وفود سے اِستفساری گفتگو کی۔لیفٹیننٹ گورنر کوپی آر آئی ممبران پر مشتمل وفود، سرحدی دیہات کے رہائشی، ٹریڈرس فیڈریشن، پہاڑی، گوجر بکروال اور اقلیتی کمیونٹیوں کے ارکان، کسانوں، ٹرانسپورٹروں، میڈیا کمیونٹی اور بار ایسوسی ایشن نے ترقی سے متعلق مختلف مسائل اور عوامی اہمیت کے دیگر امور سے آگاہ کیا۔لیفٹیننٹ گورنر منوج سِنہا نے کپواڑہ میں رات گزاری اور ضلع کے لوگوں کی ترقیاتی ضروریات کا جائزہ لینے کے لئے متعدد عوامی وفود اور اَفسران کے ساتھ بات چیت کی۔لیفٹیننٹ گورنرنے وفود کو ان کے مسائل اور شکایات کے بروقت ازالہ کی یقین دہانی کی۔اُنہوں نے میڈیا سے بات چیت کرتے ہوئے کہا کہ عوام پر مبنی پالیسیوں نے ضلع میں ہمہ گیر ترقی کو نئی تحریک دی ہے اور عام آدمی پُراَمن ماحول میں رہ رہا ہے۔ اُنہوں نے کہاکہ اِس برس 31؍ دسمبر تک ضلع میں ’’ نل سے جل ‘‘ کے تحت تمام گائوں ، پنچایتوں اور گھرانوں کا احاطہ کرنے کا ہدف حاصل کیا جائے گا ۔ لیفٹیننٹ گورنر نے گرین جے اینڈ کے مہم کے ایک حصے کے طور پر’’ سرمائی شجرکاری مہم ‘‘کا آغاز کیا۔ مہم کے دوران ضلع میں 8.5 لاکھ پودے لگائے جائیں گے۔
