یو این آئی
سرینگر//لیفٹیننٹ گورنر منوج سنہا پیر کی صبح ہمہامہ پہنچے جہاں انہوں نے کوکرناگ انکائونٹر میں جاں بحق ہونے والے ڈی ایس پی ہمایوں بٹ کے اہلخانہ کے ساتھ اظہار تعزیت و ہمدردی کیا۔ چیف سیکریٹری اے کے مہتا، صوبائی کمشنر کشمیر وجے کمار بدھوری، ڈی آئی جی وسطی کشمیر، ایس ایس پی بڈگام و دیگر اعلیٰ افسران ان کے ہمراہ تھے۔
ڈی ایس پی ہمایوں بٹ گڈول کوکرناگ کے جنگلی علاقے میں 13 ستمبر کوملی ٹینٹوں کی اندھا دھند فائرنگ کے نتیجے میں جاں بحق ہوئے تھے۔اس واقعہ میں فوج کے کرنل منپریت سنگھ اور میجر آشیش دھونک بھی جاں بحق ہوئے تھے۔لیفٹیننٹ گورنر نے ‘ایکس’ پر ایک پوسٹ میں کہا: ‘آج ہمہامہ بڈگام کا دورہ کیا اور وہاں بہادر شہید ہمایوں بٹ کے اہلخانہ سے ملا اور ان کے ساتھ اظہار تعزیت کیا’۔انہوں نے کہا: ‘کنبے کو یونین ٹریٹری انتظامیہ کی طرف سے ہر طرح کے مدد اور تعاون کی یقین دہانی کی، پوری قوم سوگوار خاندان کے ساتھ یکجہتی میں کھڑی ہے’۔ایل جی نے کچھ وقت سوگوار خاندان بشمول مقتول افسر کے والد(ریٹائرڈ آئی جی پی) غلام حسن بٹ کے ساتھ گزارا۔
