عظمیٰ ویب ڈیسک
ریاسی// بھارتی فوج نے جموں و کشمیر پولیس اور سپیشل آپریشن گروپ (ایس او جی) کے ساتھ مل کر ضلع ریاسی کے جنگلاتی علاقوں میں مسلسل آپریشن جاری رکھا ہوا ہے۔
پی آر او ڈیفنس جموں سنیل بروتال نے بتایا کہ دو مسلح جنگجوؤں کی موجودگی کی خاص اطلاع پر علاقے میں وسیع تعیناتی کے ساتھ تلاشی آپریشن شروع کیا گیا تھا۔
اطلاع کی بنیاد پر، فوج اور جموں و کشمیر پولیس نے 04 ستمبر کو ضلع ریاسی کے علاقے کالابن میں ایک آپریشن شروع کیا۔ محاصرے میں گھر کے اندر پھنسے عسکریت پسندوں نے باہر تعینات سیکورٹی اہلکاروں پر فائرنگ کی۔ اس کے بعد ہونے والی شدید گولہ باری میں، ایک جنگجو کو مار گرایا گیا۔
تصادم کے بعد گھر اور آس پاس کے علاقوں کی تفصیلی تلاشی کے نتیجے میں ایک جنگجو کی لاش کے ساتھ دیگر جنگی سامان بھی برآمد ہوا جس میں میگزین کے ساتھ ایک اے کے سیریز کی اسالٹ رائفل بھی شامل تھی۔
انہوں نے کہا کہ سرچ آپریشن جاری ہے فوج نے 03 ستمبر 23 کو اسی علاقے میں ایک آئی ای ڈی کو کامیابی سے مسمار کیا تھا۔ سیکورٹی فورسز کی ان دو مسلسل کارروائیوں سے خطے میں ایک بڑا واقعہ ٹل گیا ہے۔
انہوں نے مزید کہا کہ اندرونی علاقوں میں ان بھاری ہتھیاروں سے لیس عسکریت پسندوں کی موجودگی دشمن قوتوں کی طرف سے ایس پی پی آر کے علاقے کو غیر مستحکم کرنے کی مسلسل کوششوں کی نشاندہی کرتی ہے۔
