عظمیٰ مانٹیرنگ ڈیسک
نئی دہلی //امکان ہے کہ ہندوستان اور چین پیر کو کور کمانڈر سطح کی بات چیت کا 19 واں دور مشرقی لداخ سیکٹر میں چشول-مولڈو میٹنگ پوائنٹ پر منعقد کریں گے تاکہ دونوں ممالک کے درمیان تین سال سے جاری فوجی تعطل کو حل کیا جاسکے۔دونوں ممالک مئی 2020 سے پچھلے تین سالوں سے فوجی تعطل کا شکار ہیں، جب چینیوں نے جارحانہ طور پر لائن آف ایکچوئل کنٹرول پر جمود کو تبدیل کرنے کی کوشش کی۔”14 اگست کو چینی فوج کے نمائندوں کے ساتھ بات چیت کے لئے ہندوستانی فریق کی قیادت فائر اینڈ فیوری کور کے کمانڈر لیفٹیننٹ جنرل راشد بالی کریں گے۔ توقع ہے کہ وزارت خارجہ اور آئی ٹی بی پی کے حکام بھی بات چیت کا حصہ ہوں گے۔ دیگر معاملات کے ساتھ ڈی بی او اور سی این این جنکشن سے متعلق امور پر بات چیت کا امکان ہے۔ دفاعی ذرائع کے مطابق ہندوستان مشرقی لداخ کے محاذ سے علیحدگی کے لیے بھی دبا ڈالے گا۔یہ ملاقات تقریباً چار ماہ کے وقفے کے بعد ہو رہی ہے۔ دونوں فریقین کے درمیان کور کمانڈر کی سطح پر آخری ملاقات اس سال اپریل میں ہوئی تھی۔یہ ملاقات ایسے وقت ہو رہی ہے جب دونوں فریق اپنی اپنی پوزیشن مضبوط کرنے کے لیے سرحدی علاقوں میں تیزی سے تعمیراتی سرگرمیوں میں مصروف ہیں۔
