عظمیٰ ویب ڈیسک

سری نگر// سری نگر پولیس نے سری نگر کے نٹی پورہ علاقے میں کالعدم عسکری تنظیم لشکر طیبہ کی شاخ ٹی آر ایف سے تعلق رکھنے والے تین جنگجو معاونین کو گرفتار کیا ہے۔
پولیس ترجمان نے بتایا کہ مخصوص انٹیلی جنس پر کارروائی کرتے ہوئے، سری نگر پولیس کی ایک ٹیم نے ہرنبل نٹی پورہ میں قائم ایک چوکی پر تین جنگجو معاونین کو گرفتار کیا جن کا تعلق کالعدم عسکری تنظیم ٹی آر ایف سے ہے۔
اُنہوں نے بتایا کہ گرفتار افراد کی شناخت عمران احمد نجار ولد مرحوم عبدالرحمن نجار ساکنہ بلبل باغ بارہمولہ، وسیم احمد مٹہ ولد طارق احمد مٹہ ساکنہ قمر واری سری نگر اور وکیل احمد بٹ ولد نذیر احمد بٹ ساکنہ پازل پورہ بجبہاڑہ کے طور پر ہوئی ہے۔
ترجمان نے کہا، “ان کے قبضے سے، پولیس نے 03 دستی بم، 10 پستول کے راوند، 25اے کے-47 راوند اور دیگر مجرمانہ مواد برآمد کیا”۔
پولیس نے دعویٰ کیا کہ وکیل احمد بھٹ پہلے ایک سرگرم جنگجو تھا جس کا تعلق کالعدم عسکری تنظیم ISJK سے تھا اور وہ دو سال سے جیل میں بند تھا اور حال ہی میں سنٹرل جیل سے ضمانت پر رہا ہوا تھا۔ ابتدائی تفتیش کے دوران یہ بات سامنے آئی کہ تینوں نے سری نگر شہر میں عسکری سرگرمیوں کو انجام دینے کے لیے ٹی آر ایف کے سرگرم جنگجووں سے دھماکہ خیز مواد اور گولہ بارود اکٹھا کیا تھا۔
اُنہوں نے کہا کہ اس سلسلے میں ایکسپلوسیو ایکٹ کی دفعہ 3/4 ، آرمز ایکٹ کی دفعہ 7/25 ، یو اے پی اے ایکٹ کی دفعہ 18، 23، 39کے تحت پولیس تھانہ چنا پورہ میں ایک مقدمہ ایف آئی آر نمبر 46/23 درج کیا گیا اور تحقیقات شروع کردی گئی۔