یو این آئی
سرینگر//فائر اینڈ ایمرجنسی کی اسامیوں کے امیدواروں نے جمعرات کو ایک بار پھرپریس کالونی میں جمع ہو کر احتجاج درج کیا۔احتجاجی امیدواروںنے اپنے مطالبات کے حق میں جم کر نعرہ بازی کی جس دوران کچھ احتجاجیوں کو حراست میں بھی لیا گیا۔اس موقع پر سمیر احمد نامی ایک احتجاجی نے کہا کہ’ ہم پچھلے تین برسوں سے کبھی یہاں تو کبھی جموں میں احتجاج کر رہے ہیں لیکن انتظامیہ نے اپنی آنکھوں پر پٹی باندھ رکھی ہے‘۔انہوں نے کہا’’لیفٹیننٹ گورنر منوج سنہانے دسمبر 2022 میں ایک کمیٹی تشکیل دی تھی تاکہ سلیکشن لسٹ میں ہوئی دھاندلیوں کو دیکھا جا سکے‘‘۔ان کا کہنا تھا’’اس کمیٹی کو 12 جنوری 2023 کو اپنی رپورٹ پیش کرنی تھی لیکن 8 مہینے گزرنے کے باجود بھی وہ رپورٹ اب تک پیش نہیں کی گئی‘‘۔مذکورہ احتجاجی نے کہا کہ’ ہمارا مطالبہ ہے کہ اس رپورٹ کو پیش کیا جائے‘۔واضح رہے کہ فائر اینڈ ایمرجنسی کے امیدواروں کی جانب سے پچھلے کئی ماہ سے سرینگر اور جموں میں احتجاجی مظاہروں کا سلسلہ جاری ہے۔
