یو این آئی
سرینگر// ایڈیشنل ڈائریکٹر جنرل پولیس وجے کمار نے سرینگر جموں شاہراہ کیساتھ ساتھ جنوبی کشمیر میں ملی ٹینٹ مخالف آپریشن تیز کرنے کی ہدایات دیں۔وجے کمار نے اتوار کو یاترا کے دوران یاتریوں اور سیاحوں کی حفاظت کو یقینی بنانے کی خاطر شاہراہ اور نویوگ ٹنل کی سیکورٹی کا جائزہ لیا۔اس موقع پر وجے کمار نے ایس ایس پی کولگام کو ہدایت دی کہ قومی شاہراہ کے اردگر دعلاقوں میں ملی ٹینٹ مخالف آپریشنز میں شدت لائی جائے۔اے ڈی جی پی نے قومی شاہراہ پر حفاظتی اقدامات کا مشاہدہ کرنے کے ساتھ ساتھ یاترا گاڑیوں کو فراہم کی جارہی سیکورٹی کا بھی ذاتی طورپر معائنہ کیا۔انہوں نے آفیسران کو ہدایت دی کہ یاترا کو بہ احسن خوبی پایہ تکمیل تک پہنچانے کی خاطر سری نگر قومی شاہراہ پر حساس مقامات پر مزید نفری تعینات کی جائے۔
انہوں نے کہاکہ شاہراہ پر مزید چوکس رہنے کی ضرورت ہے اور اس بات کو یقینی بنانے کی ہدایت دی کہ یاتریوں کی حفاظت اور سلامتی پر کوئی سمجھوتنہ نہ کیا جائے۔ وجے کمار نے جوانوں سے کہاکہ سیکورٹی چیلنجوں سے بہتر طریقے سے نمٹنے اور یاتریوں کی حفاظت اور ہموار نقل وحمل کو یقینی بنانے کی خاطر بھی زمینی سطح پر اقدامات کئے جائیں۔ انہوںنے کہاکہ یاتریوں اور مقامی لوگوں کو سہولیت بہم رکھنے کی خاطر بھی سیکورٹی فورسز کے اہلکار اپنے آپ کو وقف رکھیں۔ شاہراہ پر سیکورٹی صورتحال کا جائزہ لینے کے بعد اے ڈی جی پی نے 163بٹالین سی آ ر پی ایف ہیڈ کواٹر میں پولیس اور پیرا ملٹری فورسز کے سینئر آفیسران کے ساتھ ایک میٹنگ کی جس دوران دہشت گردی کے کسی بھی ممکنہ واقعات کو روکنے کے لئے نئی حکمت عملی اپنانے پر زور دیا گیا۔میٹنگ کے دوران اے ڈی جی پی نے سری نگر جموں قومی شاہراہ پر سماج دشمن عناصر کے منصوبوں کو ناکام بنانے کی خاطر سیکورٹی گرڈ کو مزید مضبوط کرنے کی ہدایت دی۔وجے کمار نے ایس ایس پی کولگام کو ہدایت دی کہ قومی شاہراہ کے دونوں اطراف محاصرے اور تلاشی کارروائیوں میں شدت لانے کے ساتھ ساتھ ہیومن انٹیلی جنس کو بھی بروئے کار لانے کی ضرورت ہے۔ا نہوں نے کہاکہ ہیومن انٹیلی جنس کو بروئے کار لانے سے ملک دشمن عناصرکے منصوبوں کو ناکام بنانے میں مدد ملے گی۔ انہوں نے قومی شاہراہ کے مقررہ راستوں پر موثر حفاظتی انتظامات کو یقینی بنانے کی بھی ہدایات جاری کیں۔
