سید اسامہ ہدوی
قرآنِ کریم دین اسلام کی مذہبی کتاب ہے۔ اور بلا شک و شبہہ یہ ایک مسلمان کے لئے دستورِ حیات کی حیثیت رکھتی ہے۔ قرآنِ کریم کا پیغام صرف مسلمانوں کے لیے خاص نہیں ہے بلکہ اسکا پیغام تو خاک دان گیتی پر بسنے والے ہر انسان کے لیے ہے خواہ اسکا تعلق کسی بھی مذہب سے ہو۔ قرآن کریم ایک خدائی کتاب ہے جو کے نبِی آخر الزماں حضرت محمد مصطفی پر نازل ہوئی ہے یہ کتاب خداوند قدوس کی جانب سے ساری انسانیت کے لیے رب کا پیغام اور میسیج (message) ہے۔ اس کتاب کے ذریعے اللہ تبارک و تعالیٰ انسانیت سے خطاب کرتا ہے اور انہیں راہ ہدایت کو اختیار کرنے کا حکم فرماتا ہے۔ اس بات میں بھی دو رائے نہیں ہے کہ ہر مسلمان دل و جان سے قرآن کی تعظیم کرتا ہے اور اسکی تکریم بجا لاتا ہے۔ حضرت علی رضی اللہ عنہ کا فرمان ہے کہ جب میں چاہتا ہوں کہ میں رب سے بات کروں تو میں قرآنِ کریم کی تلاوت کرتا ہوں۔ اس بات سے قرآن کریم کے تقدس اور اسکی عظمت کا اندازہ ہو جاتا ہے۔ پر ہمارے لیے مر ڈوبنے کا مقام ہے کہ آج ہماری اس مقدس کتاب کو نذر آتش کیا جا رہا ہے۔ وقتاً فوقتا اسکی توہین کی جا رہی ہے اور اسکے تقدس کو پامال کرنے کی بھرپور کوشش جاری ہے اور ہم مسلمان سوائے واٹساپ اسٹیٹس لگانے کے کچھ نہیں کر پا رہے ہیں۔ ہماری مذہبی کتاب کے ساتھ ہماری نظروں کے سامنے چھیڑ کانی کی جا رہی ہے اور ہم فقط تماشائی بنے بیٹھے ہیں۔قرآن کی حفاظت کا ذمہ خود رب کریم نے لے رکھا ہے اور جسے رب رکھے اسے کون چکھے اور اسی بات کو کسی شاعر نے بیان کیا ہے:
فانوس بن کے جسکی حفاظت ہوا کرے
وہ شمع کیا بجھے جسے روشن خدا کرے
لیکن اسکے باوجود ہم مسلمان کی یہ ذمہ داری بنتی ہے کہ وہ قرآن کریم پر انگشت زنی کرنے والوں کو منہ توڑ جواب دیں اور کلام اللہ کے ساتھ ایسے ناروا سلوک کرنے والے فتنہ پرور لوگوں کا قلعہ قمع کریں۔ مگر ہمارے لیے بھی افسوس کا مقام ہے کے ہم نے درس قرآنی کو فراموش کردیا بلکہ میں تو کہونگا کہ قوم مسلم نے قرآن کے پیغام کو چھوڑ کر قرآن پر سب سے بڑا ظلم کیا ہے۔ تاریخ گواہ ہے جب تک مسلمان قرآنی پیغامات کو دامن گیر کئے ہوئے تھا تب تک وہ دنیا کا معزز و مکرم ترین قوم تھی اور جس دن مسلمان نے قرآن کے دامن کو چھوڑ دیا اسکے پیغام کو فراموش کردیا تو ثریا سے زمین پر آسماں نے ہم کو دے مارا اور اقبال نے اسی کی عکاسی کی ہے۔
درسِ قرآں نہ اگر ہم نے بھلایا ہوتا
یہ زمانہ نا زمانے نے دکھایا ہوتا
وہ زمانے میں معزز تھے مسلماں ہو کر
اور ہم خوار ہوئے تارق قرآں ہو کر
مگر ان گستاخیوں کو جواب دینے کا وقت ہے اور اپنی غیرت ایمانی کو بیدار کرکے حفاظت کلام مجید کے لیے دل و جان قربان کرنے کیلئے تیار ہونے کا وقت ہے۔ ایسے وقت میں اگر مسلمان قرآنی پیغام کو لیکر دوبارہ برسرے میدان آتا ہے تو باطل قوموں میں پھر سے لرزہ آسکتا ہے۔قرآن کے خلاف آواز اٹھانے والوں کو اگر دندان شکن جواب دینا ہے تو چند نکات پر عمل پیرا ہونے کی سخت ضرورت ہے اور یہی نکات حالات حاضرہ میں ہماری کامیابی کے ضامن ہونگے۔
۱) اپنی نسلوں کو تعلیم قرآن و پیغام قرآن سے روشناس کرائیں۔۲) تلاوت کلام اللہ کی کثرت کی جائیں۔۳) قوم مسلم کے بچوں کے سینوں کو عشق قرآن کا گنجینہ بنائیں۔۴) اپنی اولاد کو قرآن حفظ کرنے پر آمادہ کریں .۵) اپنی اولاد اور اہل و عیال عظمت و رفعت قرآن کا درس دیں ۔۶) قرآن فہمی پیدا کریں۔۷) قرآن کے امن و سکون اور سلامتی والے پیغام کو اقوام عالم تک پہنچائیں اور تبلیغ دین کے کام سر انجام دیں۔۹) قرآن کے آفاقی پیغام کو لیکر اٹھیں اور اقوامِ عالم پر چھا جائیں اور بر سرے پیکار اعلان کریں
قرآن کی امانت سینوں میں ہیں ہمارے
آساں نہیں مٹانا نام و نشاں ہمارا
ان چند نکات پر عمل پیرا ہونے سے ہمارے کافی مسائل حل ہوجائینگے اور جب ہر مسلمان اور غیر مسلم بھی قرآن کی عظمت و مقام سے واقف ہوجائیں گے تو اس طرح کی گستاخانہ حرکتوں سے باز رہیں گے۔اس بات کو کبھی بھی فراموش نہ کیاجائے قرآنی تعلیمات کے بغیر کسی طرح کی کامیابی آپکی ہاتھ نہیں آئیگی بلکہ جب تک آپ نے قرآنی تعلیمات کو اپنے دل میں سمایا ہوا ہے اور آپ اس پر مکمل طور پر عمل پیرا ہیں تب تک کامیابی آپکے قدم چومےگی اور جیسے ہی آپ نے قرآنی پیغامات کو چھوڑ دیا تو آپ زوال کا شکار ہونگے اور یہ دنیا آپکو کہیں کا نہیں چھوڑے گی۔ ایک انسان بھی حقیقی انسان اس وقت بنتا ہے جب وہ اپنی ذات کو قرآنی تعلیمات کے مطابق ڈھال نہ لے۔ قرآن ایک ایسی کتاب ہے جسکو دیکھنا بھی عبادت ہے ،اسکے ہر لفظ پر نیکیاں لکھی گئی ہیں، اسکو پڑھنا عبادت اسکو سننا عبادت ،اسکو یاد کرنا عبادت اسکو سمجھنا عبادت ،اسکی تعلیمات کی تبلیغ عبادت تو جس کتاب کی ہر بات عبادت ہو ،بھلا اس کتاب کے تقدّس اور عظمت کا اندازہ لگائیں اور غور کریں کہ ہم رب کی اس امانت سے کتنے وفادار ہیں اور لمحہ فکریہ بھی ہے کے آج ہم نے قرآن کو فقط بیٹیوں کی شادی میں بطورِ تحفہ دینے والی کتاب سمجھ لیا ہے۔ ہم اب قرآن پر صرف ہاتھ رکھ کر قسمیں کھاتے ہیں حالانکہ اگر اسکو سمجھا جاتا تو منظر ہی کچھ اور ہوتا اگر اسکی حقیقت کو سمجھا جاتا تو ہمیں اس پر ہاتھ رکھ کر قسم نہیں کھانی پڑتی۔ اسلئے قرآن کی اس پامالی میں غیروں نے تو کوئی کسر نہیں چھوڑی ،پر اپنوں نے بھی قرآن کے ساتھ کوئی انصاف نہیں کیا۔ جس کتاب کو پڑھنے کا حکم تھا، اُس کتاب کو الماری کی زینت بنا کر رکھا گیا اور یہ بھی چیخ چیخ کر کہتی رہی کہ میں رب کا فرمان ہوں ،مجھے پڑھا کرو، میں ہی وہ کتاب ہوں جو تمہاری کامیابی کی ضامن ہے۔ ہم سویڈن میں ہونے والے توہین آمیز عمل کی سخت مخالفت کرتے ہیں اور دعوت فکر دیتے ہیں ہماری قوم کو کہ اس کتاب کے ساتھ انصاف کریں ،اسے حق دیں ،اسکی تلاوت کریں، اسکی تعلیمات کو عام کریں اور نشر کریں، پھر دیکھیں کے باطل بھی آپ سے خوف زدہ ہوگا اور کہیں نا کہیں قرآن کے دشمن بھی قرآن کی تعلیمات کا اعتراف کرینگے اور پھر یہ کتاب تو ہے ہی فرقان۔ آخر میں ایک روز یہ کتاب حق و باطل کے درمیان خط امتیاز کھینچ دیگی اور اپنے ماننے والوں کو دنیا و آخرت میں کامیاب و کامرانی سے دو چار کردیگی۔
