عظمیٰ نیوز سروس
سری نگر//لیفٹیننٹ گورنر منوج سِنہا نے اتوار کو زیرو برج کا دورہ کیا اور سیلاب سے نمٹنے کی مجموعی تیاریوں کا جائزہ لیا۔لیفٹیننٹ گورنر نے محکمہ آبپاشی اور فلڈ کنٹرول کے اَفسروں کے ساتھ بات چیت کرتے ہوئے پانی کی سطح کی مسلسل نگرانی کرنے اور تمام ایجنسیوں کو بروقت قبل اَز وقت وارننگ دینے کی ہدایت دی۔چیف اِنجینئر آبپاشی اور فلڈ کنٹرول نے لیفٹیننٹ گورنر کو جانکاری دی کہ تمام متعلقہ شراکت داروں کی جانب سے ایمرجنسی صورتحال سے نمٹنے کے لئے مناسب اقدامات کئے گئے ہیں۔
محکمہ نے پانی کی سطح کو بروقت پر مانیٹر کر نے کے لئے دریائے جہلم پر 5 خود کار واٹر لیول ریکارڈرز اور 9اس کی معاون ندیوں پر نصب کئے ہیں۔ پانی کی سطح کا تجزیہ کیا جاتا ہے اور تمام شراکت داروں تک پہنچایا جاتا ہے۔لیفٹیننٹ گورنر کو جانکاری دی گئی کہ اَب سیلاب کی صورتحال ٹل گئی ہے ، سنگم میں پانی کی سطح کم ہو گئی ہے اور صورتحال قابو میں ہے۔اُنہوں نے پی ایم ڈی پی مرحلہ دوم کے کاموں کی پیش رفت کے بارے میں بھی معلومات حاصل کیں اور محکمہ کو ہدایت دی کہ وہ سیلاب سے نمٹنے کے کاموں میں تیزی لائیں بالخصوص فلڈ سپل چینل پر تاکہ عوام کی جان و مال کی حفاظت کی جاسکے۔
