عید گاہ سری نگر میں نماز عید صبح نو بجے ادا کی جائے گی: انجمن اوقاف جامع مسجد

سری نگر//انجمن اوقاف جامع مسجد سری نگر نے اعلان کیا ہے کہ حسب سابق اسلامی شریعت اور تعلیمات کے مطابق عید الاضحی کی نماز سری نگر کے تاریخی عیدگاہ میں صبح 9بجے ادا کی جائے گی۔
بارش اور موسم خراب ہونے کی صورت میں مقررہ وقت پر تاریخی جامع مسجد سرینگر میں نماز عید الاضحیٰ ادا ہوگی۔
مسلمانوں سے اپیل ہے کہ وہ اسلامی طرز پر نظم و ضبط کا مظاہرہ کرکے قبل از وقت نماز عید کیلئے عیدگاہ میں اپنی حاضری یقینی بنا کر اجر دارین حاصل کریں۔براہ کرم مصلیٰ/ جائے نماز ساتھ لائیں۔
انجمن اوقاف نے عید الاضحی اور قربانی کے پیش نظر ایک بار پھر حکام سے میرواعظ کشمیر ڈاکٹر مولوی محمد عمر فاروق کو رہا کرنے کا مطالبہ سختی کے ساتھ دہرایا ہے جو اگست 2019 سے مسلسل گھر میں نظر بند رکھے گئے ہیں جس کی وجہ سے موصوف اپنی منصبی ذمہ داریاں انجام نہیں دے پارہے ہیں جو عوا م میں اضطراب اور بے چینی کا باعث ہے۔