عوامی فلاح و بہود کے 97کروڑ کے پروجیکٹ عوام کے نام وقف:لیفٹیننٹ گورنر
سرینگر//لیفٹیننٹ گورنر منوج سنہا نے بدھ کو جموں اینڈ کشمیر انفراسٹرکچر ڈیولپمنٹ فائنانس کارپوریشن لمیٹڈ(جے کے آئی ڈی ایف سی) کے 97 کروڑ روپے کے مختلف پروجیکٹوں کا افتتاح کیا۔لیفٹیننٹ گورنر نے کہا”عوام کے لیے وقف کئے گئے ان میں سے کچھ پروجیکٹ برسوں سے زیر التوا تھے،ہمارا عزم اور توجہ تیز رفتار ترقی اور منصوبوں کی بروقت تکمیل پر ہے” ۔آج ای-افتتاح کئے گئے 15 پروجیکٹوں میں سی ایچ سی چھترگام بڈگام؛ پی ایچ سی آری پانتھن، گورنمنٹ ویمن ڈگری کالج پلوامہ میں کلاس روم/لائبریری بلاک، منتقی اسکول اونتی پورہ، صنعتی ترقی کے مرکز، فیز-I سانبہ میں کامن ایفلوئنٹ ٹریٹمنٹ پلانٹ، آئی ٹی ٹاور بلڈنگII رنگریٹ، چیکواری مال کھل کنز کھل، ڈبلیو ایس ایس موہڑہ جملان کی بہتری، زینہ کوٹ میں پانی کی جانچ کی لیبارٹری، ڈونگیاں سے جٹکی پنجپیر تک سڑک، کانشی پور آشرم روڈ سے لوئر گڈی گڑھ جموں، گوجر منڈی راجوری میں بائز ہائر سیکنڈری سکول، پٹنی ٹاپ پر سیوریج اسکیم اور کشمیر یونیورسٹی میں کھیلوں کی سہولت شامل ہے۔
لیفٹیننٹ گورنر نے تصویری کمپینڈیم بھی جاری کیا، جو کہ جے کے آئی ڈی ایف سی کے 1507 پروجیکٹوں کی تالیف ہے جو 2504 کروڑ روپے کی لاگت سے دسمبر 2022 کو ختم ہوئی تھی۔JKIDFC نے 901.25 کروڑ روپے کے 464 کنیکٹیویٹی پروجیکٹس( 309 سڑکیں اور 155 پل)کامیابی سے مکمل کئے ہیں۔ 236.42 کروڑ روپے کی لاگت سے صحت کے شعبے کے 65 منصوبے، 187.68 کروڑ بجلی کے 12منصوبے ، پانی کی فراہمی کے 329 منصوبے اور تعلیم کے شعبے کے 116 پروجیکٹ بھی شامل ہیں۔ مزید برآں، کھیلوں کی ترقی اور نوجوانوں کی شمولیت کے لیے 212 منصوبے (85 منصوبے اور 127 ذیلی منصوبے) 124.15 کروڑ روپے کی رقم میںمکمل ہو چکے ہیں۔مختلف شعبوں/اسکیموں کے تحت یہ تمام منصوبے عوامی بہبود کے لیے طے کیے گئے ہیں اور ان سے لوگوں کو بہت زیادہ فائدہ پہنچے گا اور UT کی سماجی و اقتصادی ترقی کو تقویت ملے گی۔قابل ذکر بات یہ ہے کہ JKIDFC ملک بھر میں پہلی تنظیم ہے جس نے اپنے تمام جاری منصوبوں کے لیے جیو ٹیگ شدہ امیجز کو شامل کیا ہے۔
