پادشاہی باغ سرینگر میں تلاشی آپریشن ۔3گھنٹے بعد محاصرہ ہٹایا گیا

سرینگر// سرینگر کے مضافات میں پادشاہی باغ علاقے میں شروع کیا گیا محاصرہ اور تلاشی آپریشن پیر کی سہ پہر پرامن طریقے سے اختتام پذیر ہوا۔ مشترکہ فورسز نے پادشاہی باغ کے علاقے نائیک پورہ کو گھیرے میں لے کر گھر گھر تلاشی لی۔ مقامی لوگوں نے بتایا “فورسز اور پولیس اہلکاروں کی ایک بڑی تعداد درجنوں گاڑیوں میں پہنچی اور علاقے کو گھیرے میں لے لیا‘‘۔ انہوں نے مزید کہا ’’ فورسز و پولیس نے گھر گھر جا کر تلاشی لی اور مقامی لوگوں کے شناختی کارڈ چیک کئے۔ یہاں تک کہ تلاشی کارروائی کے دوران ڈرون کو بھی استعمال کیا گیا،‘‘ ۔ انہوں نے مزید کہا کہ 3 گھنٹے سے زائد سرچ آپریشن کے بعد محاصرہ ہٹا لیا گیا۔ پولیس ذرائع نے بھی اس بات کی تصدیق کرتے ہوئے کہا کہ علاقے سے مشکوک نقل و حرکت کی اطلاع ملی تھی۔ ان کا کہنا تھا کہ سرچ آپریشن کے دوران کوئی گرفتاری عمل میں نہیں آئی۔