یواین آئی
سرینگر//پی ڈی پی صدر اور سابق وزیر اعلیٰ محبوبہ مفتی نے حضرت بل آگ متاثرین کی فوری بحالی کامطالبہ کرتے ہوئے کہا کہ سمارٹ سٹی پروجیکٹ کے تحت نصف سری نگر کی کھدائی نہ صرف لوگوں کے لئے تکلیف کا باعث بن رہی ہے بلکہ جمالیات کو بھی متاثر کر رہی ہے۔انہوں نے کہا کہ فن تعمیر اور منصوبہ بندی کے روایتی اور موروثی طرز کو ‘بیت الخلا میں نظر آنے والے کریہہ الصورت ٹائلز’ سے تبدیل کیا جارہا ہے۔موصوف سابق وزیر اعلیٰ نے ان باتوں کا اظہار منگل کو سلسلہ وار ٹویٹس میں کیا۔انہوں نے کہا،’’پیدل چلنے والوں کے راستوں کو وسیع کرنے کے لئے گاڑیوں کی سڑکوں کو تنگ کرکے ‘سمارٹ سٹی’ بنانے کے لئے نصف سری نگر کی کھدائی صرف باعث تکلیف ہی نہیں بلکہ یہ جمالیات کے قیمت پر بھی ہو رہا ہے۔ان کا کہنا تھا کہ فن تعمیر اور منصوبہ بندی کے روایتی اور موروثی طرز کو ‘بیت الخلا میں نظر آنے والے کریہہ ٹائلز’ سے تبدیل کیا جا رہا ہے۔محبوبہ مفتی نے کہا کہ مشکل اور ناپسندیدہ منصوبہ کے لئے خوبصورت ‘دیور سٹون’ کو منہدم ہوتے دیکھ کر دکھ ہوا۔انہوں نے ٹویٹ میں کہا کہ ہمارے روایتی جمالیات کو تباہ کئے بغیر بھی شہر کو سجایا جاسکتا ہے۔ پیپلزڈیموکریٹک پارٹی کی صدرمحبوبہ مفتی نے پارٹی کے سینئررہنمائوں کے ہمراہ حضرت بل آگ متاثرین کنبوں کے یہاں جاکر ہمدردی اوریکجہتی کااظہارکیا۔قابل ذکر ہے کہ پیرکوحضرت بل میں آگ کی ایک ہولناک واردات میں تین کثیرمنزلہ شاپنگ کمپلکسوں میں متعدددکانیں اورچھ مکانات بھی تباہ ہوگئے۔محبوبہ مفتی نے انتظامیہ سے مطالبہ کیا کہ آگ کی اس واردات جودن دہاڑے پیش آئی،کی تحقیقات کی جائے اورمتاثرین کی بحالی کیلئے فوری اقدام کئے جائیں۔انہوں نے سماج سے بھی آگ متاثرین کی مددکرنے کی اپیل کی۔
