بلال فرقانی
سرینگر //ایس کے آئی سی سی کے قریب بلیوارڈ پرالمناک حادثہ میں موٹر سائیکل سوار کی موت کے بعد ٹریفک پولیس سرینگر متحرک ہو گئی ہے جس کے بعد موٹر سائیکل سواروں کی جانب سے کرتب بازی (سٹنٹ ) اور تیز رفتاری کو روکنے کیلئے نئی حکمت عملی مرتب کی گئی ہے ۔ ایس ایس پی ٹریفک سٹی نے بتایا کہ آئندہ اس طرح کی ڈرائیونگ کی اجازت نہیںہو گی اور ملوثین کو پولیس کی مدد سے متعلقہ تھانوں کے ذریعے طلب کیا جائے گا ۔ ٹریفک پولیس سرینگر نے ’’اسٹنٹ ڈرائیونگ ‘‘ میں ملوث موٹر سائیکل سواروں کی شناخت کیلئے خصوصی ٹیمیں تشکیل دی ہیں۔ مظفر احمد شاہ نے کہا کہ وہ دو موٹر سائیکل کے سٹنٹ اور تیز رفتاری ڈرائیونگ کو روکنے کے علاوہ اس میں ملوث لڑکوں کی نشاندہی کرنے کیلئے کثیر سطحی اقدامات کر رہے ہیں۔انہوں نے کہا کہ یہ صرف سرینگر تک محدود نہیں ہے۔ دوسرے اضلاع کے کچھ لڑکے ہیں جو ان اسٹنٹس کیلئے سرینگر آتے ہیں۔ ہم ان کی شناخت کے عمل میں ہیں جس کے بعد ان کے خلاف بھی کارروائی ہو گی ۔ ایس ایس پی سٹی ٹریفک نے کہا کہ وہ ضلعی پولیس سے بھی مدد لیں گے اور ساتھ ہی وہ موٹر سائیکل سواروں کو متعلقہ تھانوں کے ذریعے طلب کریں گے۔شاہ نے کہا ’’ایسے مجرموں کے ساتھ سختی سے نمٹا جائے گا،”ہم نے چند کو طلب کیا ہے اور کوشش کر رہے ہیں کہ ان کی نئے سرے سے کونسلنگ کی جائے‘‘ ۔ایس ایس پی نے کہا ’’ قانون نافذ کرنے والے اداروں کے علاوہ، والدین اس قسم کے حالات کو روکنے میں ایک اہم کردار ادا کرتے ہیں۔
