منڈی پونچھ سڑک کی حالت ناگفتہ بہہ کئی ماہ سے پسیوں کا ملبہ ہی نہیں اٹھایا گیا

عشرت حسین بٹ

منڈی //منڈی پونچھ شاہراہ کی حالت انتہائی خراب ہے اور گزشتہ برس سڑک پر پڑی پسیاں ایک برس گزر جانے کے بعد بھی جوںْ کی توںْ ہیں جس کی وجہ سے سڑک پر مسافر اور نجی گاڑیوں میں سفر کرنے والے لوگوں کو کافی پریشانی کا سامنا کرنا پڑ رہا ہے۔ اگر چہ ایک سال قبل اس شاہراہ پر انتظامیہ کی جانب سے تارکول بچھایا گیا تھا وہ بھی ایک سال میں ہی اکھڑ گیا ہے۔ سڑک پر جگہ جگہ بڑے بڑے کھڈے پڑے ہوئے ہیں جن کی وجہ سے کبھی بھی کوئی بڑا حادثہ رونما ہو سکتاہے وہیں اس شاہراہ پر روزانہ سفر کرنے والے عوام نے انتظامیہ پر سوالیہ انداز میں بات کرتے ہوئے کہا کہ ایک برس قبل منڈی پونچھ سڑک کشادگی کا کام عمل میں لایا گیا تھا۔ اس کے بعد تارکول بھی بچھایا گیا تھا مگر وہ تار کول ایک سال میں ہی خستہ حال ہو گیا ۔انہوں نے الزام عائد کرتے ہوئے متعلقہ حکام کی ملی بھگت سے انتہائی غیر معیاری تار کول بچھا یا گیا ۔انہوں نے مانگ کرتے ہوے کہاکہ سڑک پر آئی پسیوں کا ملبہ اٹھانے کیساتھ ساتھ غیر معیاری کام کروانے والے ٹھیکیدار کو بھی بلیک لسٹ کیا جائے ۔